វីរបុរសក្រុមតោខៀវលោក John Terry ថាមានតែក្លិប៤ប៉ុណ្ណោះ ដែលស័ក្តិសមនឹងឈ្នះពាន Champions League នៅរដូវកាលនេះ នោះគឺ Chelsea, Bayern Munich, Manchester City និង Liverpool ។
ជាការពិតណាស់ ការចាប់ឆ្នោត Champions League វគ្គ១៦ក្រុមបានចេញជាផ្លូវការហើយ ដោយក្រុមធំៗនៅអង់គ្លេសដូចជា Liverpool ត្រូវប៉ះ Inter Milan, Manchester City ត្រូវជួបជាមួយ Sporting Lisbon, Manchester United ត្រូវប៉ះ Atletico Madrid ឯ Chelsea ត្រូវប៉ះ Lille ។
Bayern Munich ដែលជាក្រុមខ្លាំងមកពីអាល្លឺម៉ង់ ត្រូវឡើងសង្វៀនជាមួយ RB Salzburg ឯគូដែលពិសេសជាងគេនោះគឺ Paris Saint-Germain ត្រូវប៉ះជាមួយ Real Madrid ឯ Juventus របស់លោក Max Allegri ត្រូវប្រកួតជាមួយជើងឯក Europa League រដូវកាលមុនគឺ Villarreal ខណៈដែល Ajax ត្រូវប្រកួតជាមួយ Benfica។
យ៉ាងណាមិញ បន្ទាប់ពីបានឃើញការចាប់ឆ្នោតនេះរួចលោក John Terry បានបង្ហោះក្នុងបណ្ដាញសង្គម Twitter ថា៖ «តើអ្នកណាជាអ្នកឈ្នះ Champions League ឆ្នាំនេះ? ខ្ញុំគិតថា Chelsea , Bayern Munich , Liverpool និង Manchester City គឺមើលទៅទំនងណាស់»។
គួរបញ្ជាក់ថា ការប្រកួតជើងទី១នៅ វគ្គ១៦ក្រុមនេះនឹងចាប់ផ្ដើមនាថ្ងៃទី ១៦ខែកុម្ភៈខាងមុខនេះហើយ៕
