Thierry Henry បានរិះគន់ចំពោះ Paris Saint-Germain សម្រាប់ការដោះស្រាយស្ថានភាពកិច្ចសន្យារបស់ Kylian Mbappe មិនល្អ។
Mbappe បានចូលរួមជាមួយ PSG ពីគូប្រជែង Ligue 1 ក្រុម AS Monaco លើកិច្ចសន្យាខ្ចីជើងដំបូងក្នុងរដូវក្តៅឆ្នាំ ២០១៧។ កីឡាករវ័យក្មេងរូបនេះ បានធ្វើការផ្លាស់ប្តូរជាអចិន្ត្រៃយ៍នៅឆ្នាំបន្ទាប់ ដែលធ្វើឱ្យគាត់ក្លាយជាកីឡាករថ្លៃបំផុតទីពីរនៅលើពិភពលោក។
កីឡាករជម្រើសជាតិបារាំងគឺជាកីឡាករល្អបំផុតម្នាក់របស់ PSG ក្នុងរយៈពេល ៤ ឆ្នាំកន្លះចុងក្រោយនេះ។ ទោះជាយ៉ាងណាក៏ដោយ Kylian Mbappe អាចនឹងធ្វើដំណើរចេញពីក្លឹប Paris ឆាប់ៗនេះ។
Mbappe ស្ថិតក្នុងរយៈពេលប្រាំពីរខែចុងក្រោយនៃកិច្ចសន្យារបស់គាត់ជាមួយក្រុមរបស់លោក Mauricio Pochettino ។ កីឡាករវ័យ ២២ ឆ្នាំរូបនេះត្រូវបានផ្សារភ្ជាប់យ៉ាងខ្លាំងជាមួយនឹងការផ្លាស់ប្តូរទៅកាន់ក្លឹប Real Madrid ហើយមនុស្សជាច្រើនជឿថាគាត់ប្រាកដជានឹងចូលរួមជាមួយក្លឹបយក្ស La Liga នៅឆ្នាំក្រោយ។
លោក Thierry Henry បានរិះគន់ PSG ចំពោះការដោះស្រាយស្ថានភាពកិច្ចសន្យារបស់គាត់មិនល្អ។ អតីតកីឡាករសញ្ជាតិបារាំងជឿថា ក្លឹបគួរតែចងគាត់ឲ្យចុះកិច្ចសន្យាថ្មីកាលពីពីរឆ្នាំមុន។ Thierry Henry បានប្រាប់ Amazon Prime ថា៖
«វាគួរតែត្រូវបានដោះស្រាយកាលពី ២ ឆ្នាំមុន។ ខ្ញុំគិតថាកាលពី ២ ឆ្នាំមុនពួកគេគួរតែអង្គុយជាមួយ Mbappe ហើយប្រាប់គាត់ថា “នេះគឺជាក្រុមរបស់អ្នក យើងនឹងបង្កើតក្រុមនេះឲ្យល្អសម្រាប់អ្នក អ្នកនឹងក្លាយជាកីឡាករដ៏អស្ចារ្យ”។ ប៉ុន្តែឥឡូវនេះជោគវាសនារបស់គាត់ គឺខ្លួនគាត់ផ្ទាល់ជាអ្នកសម្រេច គាត់អាចចុះហត្ថលេខានៅកន្លែងណាដែលគាត់ចង់ទៅ។ ប៉ុន្តែរឿងនេះគួរតែត្រូវបានរៀបចំដោះស្រាយជាយូរមកហើយ មិនគួរអូសបន្លាយរហូតដល់ពេលនេះទេ!»៕
