ពិតណាស់ លទ្ធផលចាប់ឆ្នោតការប្រកួត Champions League វគ្គ១៦ក្រុមចុងក្រោយបានចេញជាផ្លូវការហើយ បន្ទាប់ពីមានកំហុសបច្ចេកទេសនៅលើកទី១ ដែលការចាប់ឆ្នោតលើកទី២នេះគឺ Paris Saint-Germain ត្រូវជួបប្រកួតជាមួយក្លិបខ្លាំងមកពីអេស្ប៉ាញ Real Madrid ផងដែរ។
ទន្ទឹមគ្នានោះ កំពូលខ្សែការពារ Sergio Ramos ជាអតីតប្រធានក្រុម Real Madrid ដែលបច្ចុប្បន្នលេងនៅក្លិប PSG បាននិយាយថា គេមិនអាចបន្ធូរដៃឲ្យអតីតក្លិបខ្លួននោះឡើយ និងប្រកួតប្ដូរជីវិតដើម្បី PSG ទោះបីទឹកចិត្តខ្លួននៅស្រឡាញ់ Real Madrid ក៏ដោយ។
កីឡាករសញ្ជាតិអេស្ប៉ាញវ័យ ៣៥ឆ្នាំរូបនេះ បានចំណាយពេលដល់ទៅ ១៦ឆ្នាំស្នាក់នៅទឹកដី Santiago Bernabeu ដោយបានឈ្នះពានរង្វាន់ Champions League ដល់ទៅ ៤ដងជាមួយក្លិប ប៉ុន្តែកាលពីខែមិថុនាឆ្នាំ២០២១កន្លងទៅ Ramos ត្រូវបង្ខំចិត្តចាកចេញព្រោះ Real Madrid មិនព្រមព្រៀងបន្តកុងត្រាតាមការស្នើសុំរបស់គាត់។
យ៉ាងណាមិញ Ramos និយាយថា «វាសនាគឺមើលមិនឃើញទេ ខ្ញុំចង់ចាប់ឆ្នោតប៉ះក្រុមផ្សេងដែលត្រូវតទល់ជាមួយពួកយើង។ អ្នកដឹងហើយពីក្ដីស្រឡាញ់ដែលខ្ញុំមានឲ្យ Real Madrid ។ ឥលូវនេះវាដល់ពេលដែលត្រូវការពារ PSG ហើយខ្ញុំនឹងធ្វើអ្វីគ្រប់យ៉ាងដើម្បីឲ្យពួកយើងឈ្នះ។ ក្រុមរបស់ខ្ញុំជឿទុកចិត្តលើខ្ញុំ។ ទោះប្ដូរជីវិតក៏ខ្ញុំប្រយុទ្ធដើម្បី PSG»។
គួរបញ្ជាក់ថា ការប្រកួតជើងទី១រវាង PSG និង Real Madrid ធ្វើឡើងនៅ ថ្ងៃទី១៦ខែកុម្ភៈ ឆ្នាំ២០២២ ខណៈការប្រកួតជើងទី២ធ្វើនៅថ្ងៃទី១០ ខែមីនា ឆ្នាំ២០២២៕
សូមទស្សនាវីដេអូខាងក្រោម៖
