កីឡាករដែលលេងបានច្រើនតំណែងនៅ Bayern Munich កីឡាករ Joshua Kimmich នឹងត្រូវអវត្តមានពីទីលានប្រកួតរហូតដល់ដើមឆ្នាំក្រោយ ក្រោយជួបញ្ហាសួត បន្ទាប់ពីឆ្លងកូវីដ-១៩។
ខ្សែបម្រើការពារវ័យ ២៦ឆ្នាំរូបនេះ ដែលបានអះអាងថាគេមិនបានចាក់វ៉ាក់សាំងប្រឆាំងនឹងជំងឺកូរ៉ូណា កាលពីខែតុលា ត្រូវបានតេស្ដវិជ្ជមានជំងឺរាតត្បាតនេះកាលពីខែមុន។ ហើយរយៈកាលដែលគេត្រូវធ្វើចត្តាឡីស័ក្ក បានបញ្ចប់កាលពីថ្ងៃពុធ។
Kimmich បាននិយាយថា បច្ចុប្បន្នសុខភាពគេល្អប្រសើរហើយ ប៉ុន្ដែគេពុំទាន់អាចបញ្ចេញកម្លាំងបានពេញលេញនៅឡើយទេ ដោយសារបញ្ហាប៉ះពាល់ដល់សួតរបស់គេក្រោយឆ្លងកូវីដ-១៩។
យ៉ាងណាមិញ កីឡាករជនជាតិអាល្លឺម៉ង់រូបនេះ ត្រូវបានបង្ខំចិត្តដាក់ខ្លួននៅដាច់ដោយឡែក បន្ទាប់ពីមានការពាក់ព័ន្ធជាមួយអ្នកឆ្លងកូវីដ-១៩ ហើយត្រូវបានខកខានចូលរួមការប្រកួតដែល Bayern បរាជ័យទល់នឹង Ausburg។
ទោះជាយ៉ាងណា បន្ទាប់មកគេក៏ខកខានការប្រកួតទល់នឹង Arminia Bielefeld និង Borussia Dortmund នៅ Bundesliga ព្រមទាំងការប្រកួត UEFA Champions League ទល់នឹង Dynamo Kyiv និង Barcelona៕
