Shay Given បានហៅអ្នកចាំទី Ederson របស់ Manchester City ថាជាអ្នកចាំទីល្អបំផុតនៅ Premier League ។ អតីតអ្នកចាំទី Aston Villa បានអះអាងថា កីឡាករប្រេស៊ីលរូបនេះ បានជួយក្រុមមេឃខៀវយ៉ាងច្រើន។
Manchester City បានចុះហត្ថលេខាលើ Ederson នៅរដូវក្តៅឆ្នាំ ២០១៧ ហើយអ្នកចាំទីសញ្ជាតិប្រេស៊ីល បានក្លាយជាអ្នកចាំទីជម្រើសដំបូងរបស់ពួកគេចាប់តាំងពីពេលនោះមក។ គាត់មានទម្រង់លេងដ៏អស្ចារ្យសម្រាប់ក្រុមមេឃខៀវ ហើយការបញ្ជូនបាល់របស់គាត់ជារឿយៗ ធ្វើឱ្យគាត់ខុសពីអ្នកចាំទីផ្សេងទៀតនៅក្នុង Premier League ។
Shay Given ជឿជាក់ថាកីឡាកររបស់ Manchester City ជាអ្នកចាំទីល្អបំផុតក្នុងប្រទេសអង់គ្លេសនាពេលបច្ចុប្បន្ននេះ បើទោះបីជា Alisson របស់ Liverpool រារាំងគាត់មិនអោយចូលជម្រើសដំបូងរបស់ប្រេស៊ីលក៏ដោយ។ និយាយទៅកាន់ Ladbrokes គាត់បាននិយាយថា៖
«ខ្ញុំបានជួប Ederson ច្រើនដង ពេលខ្ញុំទៅប្រកួតនៅ Manchester City ហើយសូម្បីតែមើលគាត់កំដៅសាច់ដុំក៏អស្ចារ្យដែរ។ បើអ្នកណាម្នាក់ចង់ក្លាយជាអ្នកចាំទី ខ្ញុំចង់ជំរុញឱ្យពួកគេមើលគាត់។ អ្នកអាចរៀនសូត្របានច្រើនពីគាត់។ Alisson កំពុងរារាំងគាត់ចេញពីជម្រើសដំបូងរបស់ក្រុមប្រេស៊ីល ប៉ុន្តែខ្ញុំនៅតែនិយាយថា Ederson ប្រហែលជាល្អបំផុត សម្រាប់អ្នកចាំទីនៅ Premier League»។
«កំរិតគឺខ្ពស់ណាស់ក្នុងការប្រៀបធៀបជាមួយ Edouard Mendy និង David de Gea ប៉ុន្តែខ្ញុំចូលចិត្ត Ederson តាំងពីគាត់មកដល់ Etihad»៕
