ក្រមអធិរាជសរ Real Madrid បានចេញបញ្ជីកីឡាករសម្រាប់ការប្រកួតទល់នឹង Real Sociedad នាថ្ងៃសៅរ៍ចុងសប្ដាហ៍នេះ ជាមួយនឹងវត្តមានកីឡាករឆ្នើមៗពេញសាច់សម្រាប់ការប្រកួត ស្របពេលពួកគេកំពុងនាំមុខដាច់ច្រើនពិន្ទុនៅកំពូលតារាង La Liga។
Real Madrid បាននាំមុខក្រុមលេខ២ ៧ពិន្ទុនៅពាក់កណ្ដាលសប្ដាហ៍កន្លងទៅ បន្ទាប់ពីទទួលបានជ័យជម្នះទាំងលំបាកលើ Athletic Bilbao ដោយលទ្ធផល ១-០ ដោយគ្រាប់បាល់របស់ខ្សែប្រយុទ្ធ Karim Benzema។
ហើយនៅចុងសប្ដាហ៍នេះ ក្រុមរបស់លោក Carlo Ancelotti នឹងប្រឈមជាមួយគូប្រកួតដ៏តានតឹងបំផុតមួយរបស់ពួកគេគឺ Real Sociedad ដែលឈរនៅចំណាត់ថ្នាក់លេខ៣ នៅលីគកំពូលអេស្ប៉ាញ។
ក្នុងក្រុមដែលធ្វើដំណើរទៅប្រកួតចុងសប្ដាហ៍នេះ លោក Ancelotti បានកោះហៅកីឡាករនៅក្នុងក្រុមធំសឹងតែទាំងស្រុង លើកលែងតែ Dani Ceballos និង Gareth Bale ដែលអវត្តមានផងដែរ។
យ៉ាងណាមិញ Ceballos មិនទាន់សះស្បើយពេញលេញពីរបួសនៅឡើយទេ ដោយគេកំពុងហ្វឹកហាត់នៅលើវាលស្មៅបានបន្ដិចបន្ដួច ខណៈ Bale បានត្រលប់មកហ្វឹកហាត់ ជាមួយមិត្តរួមក្រុម ប៉ុន្ដែមិនទាន់អាចលេងបាននៅឡើយទេ៕
