វិរបុរសបាល់ទាត់ប្រេស៊ីល លោក Rivaldo បានកោតសរសើរចំពោះខ្សែបម្រើមាឌល្អិតចិត្តធំ Fred ថាជាកីឡាករដែលមានឆន្ទៈខ្ពស់បំផុត ក្នុងការជួយក្រុមបិសាចក្រហម Manchester United ដែលគ្រប់គ្នាមិនគួរមើលរំលង។
ជាការពិតណាស់ Fred បានផ្លាស់មកពីក្លិប Shakhtar Donetsk មកកាន់កីឡដ្ឋាន Old Trafford ក្នុងតម្លៃខ្លួន ៤៧លានអឺរ៉ូ (ឬប្រមាណជា ៥៣លានដុល្លារអាមេរិក) កាលឆ្នាំ ២០១៨។
យ៉ាងណាមិញខ្សែបម្រើប្រេស៊ីលវ័យ ២៨ ឆ្នាំរូបនេះ បានបង្ហាញខ្លួនឲ្យក្រុមបិសាចក្រហមបាន ៨៧ប្រកួត ហើយទើបតែរកគ្រាប់បាល់បាន ៣គ្រាប់តែប៉ុណ្ណោះ ជាហេតុដែលធ្វើឲ្យរូបគេ មិនសូវមានគេចាប់អារម្មណ៍ និងទទួលរងការរិះគន់ជាច្រើនពីសំណាក់អ្នកគាំទ្រ។
ទោះជាយ៉ាងណាក្តី លោក Rivaldo បើនិយាយថា៖ «គេគ្រប់គ្នាតែងតែរិះគន់ថាក្រុម Man Utd អន់មិនដែលចេះដាក់សម្ពាធទៅលើគូប្រកួតនៅលើទីលានទេ ក៏ប៉ុន្តែខ្ញុំឃើញថា Fred ធ្វើវាបានរហូត។ គេមានឆន្ទៈខ្ពស់ណាស់ សម្រាប់ក្រុមមួយនេះ ហើយបេសកកម្មរបស់លោក Ralf Rangnick ដែលត្រូវមកដឹកនាំក្រុម Man Utd គឺត្រូវធ្វើយ៉ាងឲ្យកូនក្រុមដទៃទៀត ចេះដាក់សម្ពាធខ្លាំងទៅលើគូប្រកួត ដូច្នេះទើបក្រុមលោកអាចជោគជ័យបាន»៕
