ជាការពិតណាស់ នៅអំឡុងពេលទទួលពាន Ballon d’Or លើកទី ៧ របស់ខ្លួន Lionel Messi បានទទួលស្គាល់អំពីសមិទ្ធិផល ដែលតារាឆ្នើមរបស់ក្រុម Bayern Munich កីឡាករ Robert Lewandowski គួរទទួលបានពានរង្វាន់ សម្រាប់ឆ្នាំមុនទៀតផងដែរ។
យើងដឹងហើយថា ពានរង្វាន់ Ballon d’Or ឆ្នាំ ២០២០ ត្រូវបានលុបចោល ដោយសារកូវីដ-១៩ ទោះយ៉ាងណា Messi បានស្នើសុំឲ្យ France Football ដែលជាអ្នករៀបចំកម្មវិធីនេះ ដើម្បីប្រគល់ពានរង្វាន់ទៅឲ្យ Lewandowski ឡើងវិញ ។
ហើយឥឡូវនេះលោក Pascal Ferré ដែលជានិពន្ធនាយករបស់ទស្សនាវដ្តី France Football កំពុងធ្វើការពិចារណាលើការស្នើសុំមួយនេះ ចំពោះការប្រគល់ពានរង្វាន់ Ballon d’Or ឆ្នាំ ២០២០ ឡើងវិញ ។
លើសពីនេះ គាត់បាននិយាយទៅកាន់ Watson តាមរយៈ Bulinenews ថា ៖ «អ្វីដែល Messi និយាយគឺជាគំនិតល្អ និងឆ្លាតវៃ ។ ខ្ញុំគិតថាយើងមិនចាំបាច់ធ្វើការសម្រេចចិត្តលឿនពេកទេ។ យើងអាចគិតអំពីវា ហើយក្នុងពេលតែមួយ យើងគួរតែគោរពប្រវត្តិសាស្ត្ររបស់ Ballon d’Or ដែលផ្អែកលើការបោះឆ្នោត។ យើងមិនអាចប្រាកដបានទេថា Lewandowski នឹងអាចឈ្នះ Ballon D’Or ឆ្នាំមុនឬអត់។ យើងមិនអាចដឹងបានទេ ព្រោះគ្មានការបោះឆ្នោត។ ប៉ុន្តែនិយាយឱ្យត្រង់ទៅ Lewandowski នឹងអាចមានឱកាសឈ្នះច្រើនកាលពីឆ្នាំមុន» ៕
