Barcelona បានឈានដល់កិច្ចព្រមព្រៀងជាមួយតារាឆ្នើមរបស់ក្រុម Manchester City កីឡាករ Ferran Torres លើកិច្ចសន្យារយៈពេលវែង នេះបើយោងតាមទូរទស្សន៍អាល្លឺម៉ង់ SPORT1 ។ ទោះបីជាយ៉ាងណា ក្រុមរបស់លោក Pep Guardiola ចង់បាន ៧០ លានអឺរ៉ូសម្រាប់ការលក់កីឡាករសញ្ជាតិអេស្ប៉ាញរូបនេះ។
Torres បានចូលរួមជាមួយក្រុមជើងឯក Premier League Manchester City ពីក្រុម Valencia នៃក្របខណ្ឌ La Liga ក្នុងកិច្ចសន្យារយៈពេល ៥ ឆ្នាំកាលពីឆ្នាំមុន។ ចាប់តាំងពីបានមកដល់កីឡដ្ឋាន Etihad កីឡាករវ័យ ២១ ឆ្នាំរូបនេះបានបង្ហាញខ្លួនចំនួន ៤៣ ដងនៅគ្រប់ការប្រកួតទាំងអស់។
ទោះជាយ៉ាងណាក៏ដោយ Torres អាចនឹងចាកចេញពី Manchester City ក្នុងពេលឆាប់ៗនេះ ដោយ Barcelona ចាប់អារម្មណ៍ក្នុងការចុះហត្ថលេខាលើរូបគេ។ អ្នកចាត់ការរបស់ Barca លោក Xavi ត្រូវបានគេរាយការណ៍ថាបានកំណត់យកខ្សែប្រយុទ្ធរូបនេះ ជាបេក្ខជនដ៏ល្អក្នុងការពង្រឹងក្រុមរបស់គាត់។
វានៅតែត្រូវចាំមើល ថាតើ Barcelona មានឆន្ទៈក្នុងការបំពេញតាមសំណើរបស់ Manchester City សម្រាប់ Torres ដែរឬទេ។ បច្ចុប្បន្ន Barca កំពុងប្រឈមមុខនឹងឧបសគ្គផ្នែកហិរញ្ញវត្ថុ ហើយអាចជួបការលំបាកក្នុងការចំណាយប្រាក់ ៧០ លានអឺរ៉ូក្នុងខែមករា៕
