លោក Michael Carrick បានពន្យល់ពីមូលហេតុដែលគាត់ដក Cristiano Ronaldo ចេញពីជម្រើសដំបូងរបស់ Manchester United សម្រាប់ការប្រកួត Premier League ទល់នឹងក្រុមខ្លាំង Chelsea។
ជាការពិតណាស់ Ronaldo បានក្លាយជាអ្នកជួយសង្គ្រោះ Man Utd ក្នុងឱកាសជាច្រើនក្នុងរដូវកាលនេះ ដោយបានស៊ុតបញ្ចូលទីច្រើនជាងគេ សម្រាប់ក្លឹបក្នុងការប្រកួតទាំងអស់ ប៉ុន្តែត្រូវបានទុកចោលសម្រាប់ការប្រកួតជាមួយនឹងក្រុមកំពូលតារាង ខណៈដែលអ្នកចាត់ការទូទៅថ្មីលោក Carrick បានរៀបប្រព័ន្ធវាយលុក ដោយដាក់ Jadon Sancho, Bruno Fernandes និង Marcus Rashford។
Carrick បាននិយាយថា៖ «ការកែប្រែ និងការផ្លាស់ប្តូរមួយចំនួនដើម្បីធ្វើឱ្យអ្វីៗមានភាពស្រស់ស្រាយឡើងវិញ។ ដូចជា Anthony Martial និង Donny van de Beek ផងដែរគឺអង្គុយនៅកៅអីបម្រងុង ហើយ Cristiano Ronaldo គឺជាកីឡាករដ៏អស្ចារ្យក៏ស្ថិតក្នុងកៅអីបម្រុងផងដែរ»។
គួរបញ្ជាក់ថា Carrick នៅតែជាអ្នកទទួលខុសត្រូវសម្រាប់ការប្រកួតជាលើកទីពីរជាប់ៗគ្នា និងជាលើកទីមួយក្នុង Premier League បន្ទាប់ពីបានដឹកនាំការប្រកួតទល់នឹងក្រុម Villarreal កាលពីពាក់កណ្តាលសប្តាហ៍មុន៕
