លោក Eric Cantona ដែលជាវីរបុរសរបស់ក្លិប Manchester United បានប្រកាសដោយលេងសើចផ្ទាល់មាត់ថា លោកនឹងក្លាយជាគ្រូបង្វឹកថ្មីរបស់ក្លិបមួយនេះ បើទោះបីជាលេចឮព័ត៌មានថា Man UTD បានយល់ព្រមហៅលោក Ralf Rangnick មកដឹកនាំបណ្ដោះអាសន្នក៏ដោយ។
បុរសជនជាតិបារាំងវ័យ ៥៥ ឆ្នាំរូបនេះ បានចូលលេងនៅបិសាចក្រហមកាលពីឆ្នាំ ១៩៩២ ដល់ ១៩៩៧ និងបានក្លាយជាវីរបុរស និងអតីតប្រធានក្រុមដ៏ឆ្នើមមួយរូប ក្នុងប្រវត្តិសាស្ត្ររបស់ក្លិប ដោយធ្លាប់ស៊ុតបញ្ចូលទីបាន ៨២គ្រាប់។
លោក Cantona បានប្រកាសក្នុងវីដេអូមួយបង្ហោះក្នុងបណ្ដាញសង្គម Instagram ថា៖ «សួស្ដីមិត្តៗទាំងឡាយ! ខ្ញុំចង់ប្រាប់អ្នកថា ខ្ញុំជាគ្រូបង្វឹកថ្មីរបស់ក្លិប Manchester United ខ្ញុំនឹងជម្រាបអ្នកនាពេលក្រោយពីឈ្មោះរបស់បុគ្គលិករបស់ខ្ញុំ ចាំជួបគ្នាឆាប់ៗ»។
គួរបញ្ជាក់ថា លោក Eric Cantona ធ្លាប់ជួយឲ្យ Manchester United លើកពាន Premier League ៤ដង, Community Shield ៣ដង និងបានឈ្នះពានផ្ទាល់ខ្លួនដូចជា PFA Players’ Player of the Year និង FWA Footballer of the Year ផងដែរ៕
