ការស្វែងរកអ្នកចាត់ការបណ្ដោះអាសន្នរបស់ Manchester United ទំនងជាត្រូវបានបញ្ចប់។ របាយការណ៍កាលពីថ្ងៃព្រហស្បតិ៍បានអះអាងថាក្រុម Old Trafford បានឈានដល់កិច្ចព្រមព្រៀងជាមួយអតីតគ្រូបង្វឹក RB Leipzig លោក Ralf Rangnick ។
អ្នកចាត់ការសញ្ជាតិអាឡឺម៉ង់ ត្រូវបានគេរាយការណ៍មកថា នឹងចូលកាន់តំណែងជាគ្រូបង្វឹកបណ្តោះអាសន្នរបស់បិសាចក្រហម។ លោក Michael Carrick មានអារម្មណ៍ថា Manchester United អាចសម្របខ្លួនទៅនឹងការទាមទាររបស់អ្នកចាត់ការថ្មី ចំពេលមានទំនាក់ទំនងទាំងនេះ។
បើមានសេចក្តីរាយការណ៍ត្រូវបានគេជឿ លោក Rangnic បានយល់ព្រមដឹកនាំ Manchester United រហូតដល់ចប់រដូវកាល។ បន្ទាប់មកអតីតគ្រូបង្វឹក Schalke នឹងបន្តនៅ Old Trafford ក្នុងតួនាទីជាទីប្រឹក្សារយៈពេលពីរឆ្នាំទៀត។
ទោះបីជាយ៉ាងណាក៏ដោយលោក Rangnick នឹងមិនមានវត្តមានសម្រាប់ការប្រកួត Premier League របស់ Manchester United ជាមួយក្រុមកំពូលតារាង Chelsea នៅថ្ងៃអាទិត្យនោះទេ គឺលោក Michael Carrick ជាអ្នកបន្តដឹកនាំបិសាចក្រហមក្នុងការប្រកួតទល់នឹងក្រុមរបស់លោក Thomas Tuchel ។
នៅមុនការប្រកួតរបស់ Manchester United ជាមួយ Chelsea លោក Carrick បានអះអាងថាបិសាចក្រហមនឹងសម្របតាមការទាមទាររបស់អ្នកចាត់ការថ្មីរបស់ពួកគេ ដោយមិនគិតពីអ្នកណាដែលចូលមក។
ទោះជាយ៉ាងណាក៏ដោយ Carrick បានបង្ហាញអារម្មណ៍មិនសប្បាយចិត្ត ចំពោះទំនាក់ទំនងរបស់ Manchester United ជាមួយលោក Rangnic ។ គាត់បាននិយាយថា៖ «ខ្ញុំមិនគិតច្រើនទេ អ្វីដែលខ្ញុំគិតគឺការប្រកួតនៅថ្ងៃខាងមុខ»។
រំលឹកឡើងវិញដែរថាលោក Carrick បានដឹកនាំ Manchester United ឈ្នះ Villarreal ក្នុងការប្រកួត Champions League កាលពីដើមសប្តាហ៍នេះ។ ទោះបីជាយ៉ាងណាក៏ដោយ អតីតខ្សែបម្រើរូបនេះអាចចុះចេញពីដំណែង បន្ទាប់ពីការប្រកួតរបស់បិសាចក្រហមជាមួយ Chelsea នៅថ្ងៃអាទិត្យខាងមុខនេះ៕
