ខ្សែប្រយុទ្ធក្លិប AC Milan កីឡាករ Zlatan Ibrahimovic បានទទូចឲ្យក្លិប Manchester United ផ្តោតលើពេលបច្ចុប្បន្ន បើពុំដូច្នោះទេ គួរតែទៅមន្ទីរពេទ្យ ដើម្បីលាងសម្អាតខួរក្បាលចេញ។
ជាការពិតណាស់ Zlatan បានលើកឡើងដូច្នេះ បន្ទាប់ពីបច្ចុប្បន្ន Man Utd កំពុងតែទទួលបានលទ្ធផលដុនដាបខ្លាំងមែនទែន ដោយថ្មីៗនេះក្លិបក៏ទើបតែនឹងបណ្តេញអ្នកចាត់ការក្រុមលោក Ole Gunnar Solskjaer ចេញពីតំណែងផងដែរ។
នៅពេលសួរអំពីបញ្ហាបច្ចុប្បន្នរបស់បិសាចក្រហម Zlatan បានប្រាប់ The Guardianថា៖ «Man Utd ចូលចិត្តនិយាយពីរឿងអតីតកាលណាស់។ នៅពេលដែលខ្ញុំលេងនៅទីនោះ ខ្ញុំបាននិយាយថា ខ្ញុំមកទីនេះដើម្បីជួយក្លិបក្នុងពេលបច្ចុប្បន្ន និងបង្កើតរឿងរ៉ាវថ្មីៗសម្រាប់ខ្លួនឯង។ អ្នកត្រូវតែគិតពីបច្ចុប្បន្ន ឬក៏ទៅមន្ទីរពេទ្យដើម្បីលាងសម្អាតខួរក្បាលចេញ»៕
