កីឡាករ Gareth Bale បានបង្ហាញខ្លួនជាអន្តរជាតិលើកទី ១០០ របស់គាត់សម្រាប់ក្រុមជម្រើសជាតិ Wales ក្នុងជ័យជម្នះលើក្រុម Belarus ប៉ុន្តែត្រូវបានប្តូរចេញភ្លាមៗ ពីការប្រកួតដ៏លំបាកជាមួយបែលហ្ស៊ិក កាលពីថ្ងៃអង្គារដោយសារតែរបួសមួយផ្សេងទៀត។
គួររំលឹកថា ខ្សែប្រយុទ្ធរបស់ Real Madrid រូបនេះបានចាប់ផ្តើមក្នុងជ័យជម្នះ ៥-១ លើក្រុម Belarus កាលពីថ្ងៃសៅរ៍ ប៉ុន្តែអាចលេងបានត្រឹមតែ ៤៥ នាទីប៉ុណ្ណោះ បន្ទាប់ពីមានអារម្មណ៍ឈឺចាប់ត្រង់កំភួនជើងរបស់គាត់ ហើយត្រូវបានប្តូរចេញនៅពេលសម្រាកផងដែរ។
វាពិតជាដំណឹងអាក្រក់សម្រាប់ Bale ដែលមិនបានបង្ហាញខ្លួនឱ្យ Real Madrid ចាប់តាំងពីថ្ងៃទី ២៨ ខែសីហា ទល់នឹង Real Betis ។
ទោះបីជាយ៉ាងណាក៏ដោយ វាធម្មតាទៅហើយសម្រាប់ Los Blancos ដែលបានរង់ចាំតាំងពីខែសីហាមក ហើយឥឡូវនេះ ក្លឹបនឹងប្រកួតដោយគ្មានខ្សែប្រយុទ្ធរបស់ពួកគេម្នាក់នេះម្តងទៅទៀត៕
