ក្រុមម្ចាដ់ជើងឯក EURO 2020 អ៊ីតាលី ត្រូវការប្រកួត play-off ដើម្បីមានសង្ឃឹមទទួលបានកៅអីលេងនៅ FIFA World Cup ២០២២ បន្ទាប់ពីបញ្ចប់ការប្រកួតស្មើគ្នាទល់នឹង អៀរឡង់ខាងជើងដោយលទ្ធផល ០-០ ដែលធ្វើឱ្យពួកគេស្ថិតនៅចំណាត់ថ្នាក់លេខ២ ក្នុងតារាងនៃពូល C។
អ៊ីតាលីត្រូវការ៣ពិន្ទុជាចាំបាច់ក្នុងការប្រកួតនោះ ប៉ុន្ដែពួកគេមិនអាចរកគ្រាប់បាល់បញ្ចូលទីបាន ស្របពេលស្វ៊ីសដែលស្ថិតនៅក្នុងពូលជាមួយគ្នា យកឈ្នះបេឡារ៉ូស ៤-០ ធានាការឆ្លងផុតវគ្គជម្រុះនេះ។
ទោះមិននៅសល់ឱកាសចូលរួមព្រឹត្តិការណ៍ World Cup ប៉ុន្ដែក្រុមអៀរឡង់ខាងជើងទទួលបានលទ្ធផលល្អគាប់ចិត្ត សម្រាប់ការប្រកួតក្នុងទឹកដីរបស់ពួកគេ ដោយមិនរបូតគ្រាប់បាល់សូម្បីមួយគ្រាប់នៅទីនោះ។
គួរបញ្ជាក់ថា អ៊ីតាលីមិនមែនជាក្រុមខ្លាំងតែមួយដែលមិនអាចកក់សំបុត្រយន្ដហោះ ទៅចូលរួមប្រកួតនៅកាតារតាមរយៈការប្រកួតជម្រុះវគ្គចែកពូលនោះទេ ដោយកាលពីម្សិលមិញក្រុមព័រទុយហ្កាល់ ក៏បានជួបរឿងខកចិត្តដូចគ្នានេះដែរ ក្រោយបរាជ័យចុងម៉ោងដ៏គួរឱ្យភ្ញាក់ផ្អើលទល់នឹងស៊ែប៊ី៕
សូមទស្សនាវីដេអូខាងក្រោម៖
https://www.youtube.com/watch?v=iPKa6Y5AZT4
