យោងតាមរបាយការណ៍ Real Madrid មានបំណងចង់ទាក់ទាញខ្សែការពារ Antonio Rudiger របស់ Chelsea ទៅកាន់កីឡដ្ឋាន Santiago Bernabeu លើការផ្ទេរដោយឥតគិតថ្លៃនៅរដូវក្តៅក្រោយ។ កីឡាករវ័យ ២៨ ឆ្នាំបានក្លាយជារនាំងការពារដ៏រឹងមាំរបស់ Chelsea ក្រោមការដឹកនាំរបស់ Thomas Tuchel។ គាត់បានដើរតួយ៉ាងសំខាន់ក្នុងការដឹកនាំក្រុមតោខៀវឱ្យឈ្នះពានរង្វាន់ Champions League និង FA Cup ចាប់តាំងពីគាត់បានផ្លាស់ទៅ Stamford Bridge ក្នុងឆ្នាំ ២០១៧ ។
លោក Carlo Ancelotti អ្នកចាត់ការទូទៅរបស់ក្លឹប Real Madrid បច្ចុប្បន្នគឺជាអ្នកកោតសរសើរយ៉ាងខ្លាំងចំពោះខ្សែការពាររូបនេះ ហើយចាប់អារម្មណ៍ក្នុងការនាំយកគាត់ទៅកាន់ Bernabeu ។ ជាមួយនឹង Sergio Ramos នៅ Paris Saint-Germain និង Raphael Varane នៅ Manchester United លោក Ancelotti ត្រូវការនាំយកខ្សែការពារកណ្តាលម្នាក់ទៀត ដើម្បីបង្កើនជម្រើសរបស់គាត់។ បច្ចុប្បន្ន Rudiger គឺជាគោលដៅសំខាន់របស់ក្លឹប។
ជាមួយនឹងការរាយការណ៍ថា Madrid មានបំណងផ្តល់ប្រាក់ឈ្នួល ២00,000 ផោនក្នុងមួយសប្តាហ៍ ក្លឹបត្រូវបានគេរំពឹងថានឹងលក់តារាឆ្នើមៗមួយចំនួន ដើម្បីប្រមូលលុយសម្រាប់ Rudiger ។ មន្ត្រីជាន់ខ្ពស់ Los Blancos កំពុងសម្លឹងមើលការលក់ Gareth Bale, Isco និង Marcelo ដើម្បីប្រមូលថវិកាចាំបាច់។ ក៏មានពាក្យចចាមអារ៉ាមថា Eden Hazard បន្ទាប់ពីមិនសូវបានបង្ហាញខ្លួនជាមួយ Real Madrid នឹងចាកចេញពីកីឡដ្ឋាន Santiago Bernabeu ផងដែរ៕
