Liverpool បានបញ្ជាក់ថា កីឡាករ Roberto Firmino បានរងរបួសសរសៃពួរយ៉ាងធ្ងន់ធ្ងរ ដោយវានៅមិនទាន់កំណត់ថា តើខ្សែប្រយុទ្ធប្រេស៊ីលរូបនេះ នឹងត្រៀមខ្លួនចូលលេងនៅពេលណានោះទេ។
ខ្សែប្រយុទ្ធវ័យ ៣០ ឆ្នាំរូបនេះ លេងបានត្រឹមតែ ៣៣ នាទីប៉ុណ្ណោះនៃការប្រកួត Champions League ជាមួយ Atletico Madrid បន្ទាប់ពីត្រូវបានប្តូរចេញនៅពាក់កណ្តាលតង់។
Firmino ប្រឈមនឹងការសម្រាករយៈពេលយូរ ទោះបីជាលោក Jurgen Klopp បានប្រាប់គេហទំព័រផ្លូវការរបស់ Liverpool ថា «មិនមែនជាព័ត៌មានល្អសម្រាប់ Firmino ទេដែលមានបញ្ហារបួសសរសៃពួរធ្ងន់ធ្ងរ ពិតជាអកុសលណាស់។ យើងមិនដឹងច្បាស់ថា គាត់នឹងជាសះស្បើយនៅពេលណាទេ ប៉ុន្តែវានឹងនៅក្រោយពេលសម្រាកអន្តរជាតិ។ យើងត្រូវធ្វើការលើរឿងនោះ»៕
