កីឡាករ Lucas Moura បានលើកឡើងថា វាតែងតែជារឿងគ្រោះថ្នាក់សម្រាប់ក្រុមរបស់គេ ដែលត្រូវជួបតទល់ជាមួយនឹង Manchester United។ ប៉ុន្តែគាត់ជឿជាក់ថា Spurs នឹងព្យាយាមផ្តោតទៅលើការប្រកួតឱ្យបាន ដើម្បីដណ្តើមយក ៣ ពិន្ទុនៅចុងសប្តាហ៍នេះ។
គួរបញ្ជាក់ថា Spurs នឹងបើកកីឡដ្ឋាន Tottenham Hotspur Stadium របស់ខ្លួនទទួលស្វាគមន៍ក្រុមភ្ញៀវ Man UTD នាការប្រកួតសប្តាហ៍ទី ១០ នៃក្របខណ្ឌ Premier League ខណៈកាលពីសប្តាហ៍មុនក្រុមទាំង ២ សុទ្ធតែបាត់បង់ ៣ ពិន្ទុដូចគ្នា ដោយក្រុមបិសាចក្រហមចាញ់ Liverpool ៥-០ និងក្រុមមាន់ខ្នាយមាសចាញ់ West Ham ១-០។
មុនជួបគ្នានៅសប្តាហ៍នេះ Moura បានរៀបរាប់ប្រាប់ទៅកាន់សារព័ត៌មាន Standard Sport យ៉ាងដូច្នេះថា៖ «វាតែងតែជារឿងគ្រោះថ្នាក់សម្រាប់ក្រុមពួកយើង ដែលត្រូវលេងតទល់ជាមួយពួកគេ។ ពួកគេមានភាពស្រែកឃ្លានជ័យជម្នះ ដោយសារកាលពីសប្តាហ៍មុនពួកគេបានចាញ់ Liverpool ហើយចំណែកយើងក៏ស្រែកឃ្លានជ័យជម្នះដូចគ្នា ដោយសារយើងបានបរាជ័យក្រោមថ្វីជើងក្រុម West Ham។ ពួកគេមានធនធានកីឡាករល្អៗច្រើន មានបទពិសោធន៍ល្អៗ នៅក្នុងវិស័យបាល់ទាត់។ ម្យ៉ាងទៀតពួកគេនឹងដឹងពីរបៀបដែលត្រូវលេងតទល់ជាមួយពួកយើង។ នេះមិនមែនជាបញ្ហាសម្រាប់ពួកយើងទេ អ្វីដែលសំខាន់យើងត្រូវតែប្រឹងប្រែងឱ្យអស់ពីសមត្ថភាព យើងត្រូវដើរនៅលើទីលាន ហើយប្រយុទ្ធដើម្បីក្រុមរបស់យើងទទួលបាន ៣ ពិន្ទុនៅថ្ងៃនោះ៕
