នៅទីបំផុតគ្រូបង្វឹក លោក Ronald Koeman ត្រូវបានក្លិបប្រកាសបណ្តេញចេញជាផ្លូវការហើយ កាលពីយប់ថ្ងៃពុធ បន្ទាប់ដឹងនាំក្រុមទទួលបានលទ្ធផលដ៏គួរឲ្យខកចិត្តមួយផ្សេងទៀត ដោយចាញ់ក្នុងលទ្ធផល ១-០ ក្រោមថ្វីជើងរបស់ Rayo Vallecano ជាមួយនឹងគ្រាប់បាល់របស់កីឡាករ Radamel Falcao ។
បើយោងតាមរបាយការណ៍នៅក្នុងប្រទេសអេស្ប៉ាញជាច្រើន បានបង្ហាញឲ្យដឹងថា Xavi គឺជាជម្រើសកំពូលរបស់ក្រុម Barcelona ដើម្បីស្នងតំណែងលោក Koeman ហើយវាត្រូវបានគេយល់ទៀតថា ភាគីទាំង ២ ក៏បានជួបពិភាក្សាគ្នារួចរាល់ហើយផងដែរ ។
មិនតែប៉ុណ្ណោះ ប្រភពខាងលើក៏បានបន្ថែមទៀត Xavi នឹងអាចទិញចូលកីឡាករថ្មីៗមួយចំនួន នៅពេលលោកទទួលបានតំណែងមួយនេះ ដោយបានធ្វើការកំណត់យកខ្សែប្រយុទ្ធ Raheem Sterling របស់ក្លិប Manchester City ដែលបច្ចុប្បន្នហាក់កំពុងមានភាពខកចិត្តខ្លាំង នៅឯទឹកដី Etihad ។
លើសពីនេះ ដោយបានមើលឃើញពីភាគខ្វះខាតនៅក្នុងតំបន់ខាងក្រោម នៅក្នុងក្រុម Barcelona ដូច្នេះ Xavi ក៏បានកំណត់យកខ្សែការពារ Sevilla និងជាគោលដៅដ៏ធំមួយរបស់ក្លិបតោខៀវ Chelsea កីឡាករ Jules Kounde ដែលអាចជាដំណោះស្រាយ ចំពោះបញ្ហាខ្សែការពាររបស់ក្លិបបាន ។
មួយវិញទៀត Xavi ក៏មានទំនុកចិត្តយ៉ាងពេញទំហឹងទៅលើខ្សែប្រយុទ្ធ Ousmane Dembele ផងដែរ ដោយលោកសង្ឃឹមថាកីឡាករសញ្ជាតិបារាំងរូបនេះ នឹងអាចព្រមទទួលយកកិច្ចសន្យាថ្មីជាមួយក្លិប Barca បន្ថែមទៀត ខណ:ពេលកុងត្រាបច្ចុប្បន្នរបស់គេនឹងត្រូវផុតកំណត់ នៅរដូវក្តៅឆ្នាំក្រោយ ៕
