PSG បានចូលរួមជាមួយ Liverpool ក្នុងការប្រជែងដើម្បីចុះហត្ថលេខាលើកីឡាករ Raphinha របស់ Leeds United តាមការណែនាំរបស់ Neymar Jr នេះបើយោងតាមការចុះផ្សាយរបស់ Team Talk។
Raphinha គឺជាកីឡាករដ៏សំខាន់បំផុតម្នាក់របស់ Leeds United ក្នុងរដូវកាលមុន។ ទម្រង់លេងថ្មីៗរបស់គាត់បានទាក់ទាញចំណាប់អារម្មណ៍ពីក្រុមយក្សនៅអឺរ៉ុបរួមទាំង PSG និង Liverpool។
ទម្រង់លេងថ្មីៗរបស់គាត់សម្រាប់ Leeds បានធ្វើឱ្យគាត់ទទួលបានកៅអីនៅក្នុងក្រុមជម្រើសជាតិប្រេស៊ីលជាមួយនឹង Neymar ។ Raphinha បានចាប់ផ្តើមអាជីពក្នុងការប្រកួតអន្តរជាតិរបស់គាត់យ៉ាងល្អ ដោយបានបញ្ជូនបាល់ឱ្យមិត្តរួមក្រុមស៊ុតបញ្ចូលទីចំនួនពីរលើក មុននឹងស៊ុតបញ្ចូលទីបានពីរគ្រាប់ទល់នឹងក្រុម Uruguay កាលពីដើមខែនេះ។
នោះបានជំរុញឱ្យ Neymar ចង់នាំយក Raphinha ទៅកាន់ PSG ក្នុងទីផ្សារដោះដូរកីឡាករនាពេលខាងមុខ។ ភ្នាក់ងាររបស់ Raphinha និងជាអតីតតារាឆ្នើមរបស់ក្លឹប Barcelona លោក Deco បានបង្ហើបថា Raphinha កំពុងទាក់ទាញចំណាប់អារម្មណ៍ពីក្លឹបផ្សេងៗ រួមទាំង Liverpool ផងដែរ។ ប៉ុន្តែ Raphinha រីករាយក្នុងការស្នាក់នៅ Leeds ដោយក្លឹបមួយនេះក៏ចង់រក្សាតារារបស់ពួកគេផងដែរ។ Deco បានប្រាប់ទៅកាន់សារព័ត៌មានប្រេស៊ីល Globo ថា៖ «ពិតជាមានក្លឹបជាច្រើនចាប់អារម្មណ៍លើគាត់។ Liverpool ពេញចិត្តគាត់ ប៉ុន្តែមិនមានអ្វីផ្លូវការទេ។ Leeds ចង់រក្សាគាត់ឱ្យនៅរដូវកាលបន្ទាប់។ Raphinha សប្បាយចិត្តនៅ Leeds ប៉ុន្តែនឹងមានពេលមួយដែលគាត់នឹងចាកចេញ គឺដើម្បីបោះជំហានឡើងក្នុងអាជីពរបស់គាត់ ហើយឈានទៅមុខ»។
បច្ចុប្បន្ន Raphinha នៅសល់កុងត្រារយៈពេល 3 ឆ្នាំទៀតលើកិច្ចសន្យារបស់ Leeds ដែលនឹងធ្វើឱ្យមានការពិបាកសម្រាប់ PSG និង Liverpool ក្នុងការទាក់ទាញគាត់ឱ្យចាកចេញ។ បច្ចុប្បន្នគេហទំព័រ Transfermarkt បានកំណត់តម្លៃខ្សែប្រយុទ្ធវ័យ ២៤ ឆ្នាំរូបនេះក្នុងតម្លៃ ៣២ លានអឺរ៉ូ។
គួររំលឹកថាទាំង Liverpool និង PSG សុទ្ធតែត្រូវការខ្សែប្រយុទ្ធថ្មី។ នៅទីបំផុតហង្សក្រហមនឹងត្រូវការអ្នកជំនួសតំណែងជួរមុខទាំងបីរបស់ពួកគេ ខណៈដែលអនាគតមិនច្បាស់លាស់របស់ Mauro Icardi នៅ PSG អាចជំរុញឱ្យក្លឹបយក្សប៉ារីសធ្លាក់ចូលក្នុងទីផ្សារដោះដូរកីឡាករនេះដែរ៕
សូមទស្សនាវីដេអូខាងក្រោម៖
