Lionel Messi បានបញ្ចប់ការស្នាក់នៅជិតពីរទសវត្សរ៍របស់គាត់នៅក្នុងប្រទេសអេស្ប៉ាញ ខណៈដែលគាត់បានចាកចេញពី Barcelona ទៅចូលរួមជាមួយ Paris Saint-Germain នៅរដូវក្តៅនេះ។ យ៉ាងណាក៏ដោយ ប្រធាន La Liga លោក Javier Tebas បានអះអាងថា ការចាកចេញរបស់កីឡាករអាហ្សង់ទីន និងតារាឆ្នើមផ្សេងទៀតក្នុងប៉ុន្មានឆ្នាំថ្មីៗនេះ មិនមានផលប៉ះពាល់លីកអេស្ប៉ាញឡើយ។
Cristiano Ronaldo បានចាកចេញពីក្លឹប Real Madrid នៅរដូវក្តៅឆ្នាំ 2018។ ស្របពេលជាមួយគ្នានេះដែរ ខ្សែការពាររបស់អធិរាជស Sergio Ramos និង Raphael Varane បានចាកចេញពីក្លឹបនៅឆ្នាំនេះ ដោយបន្ថែមការចាកចេញរបស់ Messi ពី Barcelona ។
ទោះបីជាមានការចាកចេញរបស់តារាល្បីៗក៏ដោយ ក៏ Tebas មានសុទិដ្ឋិនិយមចំពោះលីករបស់ La Liga៖ គាត់បាននិយាយថា៖ «អវត្តមានរបស់ពួកគេមិនប៉ះពាល់ដល់ពួកយើងនោះទេ ពីព្រោះពួកយើងបានលក់សិទ្ធផ្សាយចំនួន ៤រដូវកាល ហើយឆាប់ៗខាងមុខនេះ យើងនឹងប្រកាសអំពីកិច្ចព្រមព្រៀងសំខាន់ៗមួយចំនួនបន្ថែមទៀត បើទោះបីជាគ្មានវត្តមាន Messi នៅទីនេះក៏ដោយ»។
Tebas បានស្វាគមន៍ ហើយរំពឹងទុកថា Erling Haaland, Jose Mourinho, Pep Guardiola និងបុគ្គលល្បីៗផ្សេងទៀតក្នុងការវិលត្រលប់ ឬមកដល់ La Liga ដោយនិយាយថា៖ «ពួកយើងចង់ឱ្យពួកគេបន្តនៅទីនេះ ប៉ុន្តែខ្ញុំក៏ចង់បានកីឡាករដ៏អស្ចារ្យផ្សេងទៀតនៅក្នុងប្រទេសអេស្ប៉ាញដូចជា Haaland ឬគ្រូបង្វឹកដ៏អស្ចារ្យដូចជា Guardiola ឬ Mourinho »។
បញ្ជាក់ផងដែរថា Lionel Messi បានបញ្ចប់ការប្រកួត La Liga របស់គាត់បន្ទាប់ពីចាកចេញពី Barcelona ទៅ PSG នៅរដូវក្តៅនេះ។ កីឡាករអាហ្សង់ទីនបានចុះហត្ថលេខាលើកិច្ចសន្យារយៈពេលពីរឆ្នាំជាមួយក្លឹបយក្សរបស់បារាំង ៕
