លោក Ronald Koeman អ្នកចាត់ការរបស់ Barcelona បានទម្លាយឱ្យដឹងថា ខ្សែប្រយុទ្ធ Sergio Aguero ទំនងអាចលេងក្នុងជម្រើស១១នាក់ដំបូងនៃការប្រកួតទល់នឹង Rayo Vallecano នៅរាត្រីថ្ងៃពុធនេះ។
Aguero បានខកខានបង្ហាញខ្លួនលើទីលានយ៉ាងច្រើនប្រកួត ក្នុងរដូវកាលនេះ ដោយសារបញ្ហារបួស អំឡុងហ្វឹកហាត់មុនបើករដូវកាល ក្រោយទើបចូលរួម Barcelona ថ្មីៗ។
ខ្សែប្រយុទ្ធអាហ្សង់ទីនវ័យ ៣៣ឆ្នាំរូបនេះ បានចូលរួមក្លិបដែលមានមូលដ្ឋាននៅតំបន់ស្វ័យតកាតាឡូញ៉ា ដោយពុំមានតម្លៃផ្ទេរ បន្ទាប់ពីចំណាយពេល ១០ឆ្នាំដ៏ជោគជ័យ ជាមួយក្លិបអង់គ្លេស Manchester City។
ទោះយ៉ាងណាក្ដី ពេលនេះ Aguero អាចត្រលប់មកជួយក្រុមអ្នកមានបុណ្យបានយ៉ាងពេញលេញ បន្ទាប់ពីបង្ហាញខ្លួនក្នុងការប្រកួត El Clasico ទល់នឹង Real Madrid ដោយរកគ្រាប់បាល់ចុងម៉ោងក្នុងការប្រកួតនោះ។
ហើយពេលនេះ ខ្សែប្រយុទ្ធដ៏មុតស្រួចរូបនេះ កំពុងសម្លឹងឱកាស ក្នុងការបង្ហាញខ្លួនលើទីលានក្នុងជម្រើសដំបូង ខណៈលោក Koeman ក៏បានបើកភ្លើងបៃតងឱ្យផងដែរ។
Koeman និយាយថា៖ “គេមិនទាន់ត្រៀមខ្លួនរួចរាល់សម្រាប់ការលេងពេញ ៩០នាទីឡើយ ប៉ុន្ដែគេអាចលេងក្នុងជម្រើសដំបូង ឬលេងក្នុងតង់ទី២។ គេបានត្រៀមរួចរាល់ ដើម្បីទទួលបាននាទីលេងបន្ថែមទៀត”៕
