ខ្សែបម្រើបារាំង Paul Pogba បានបង្ហាញតម្រុយថា គេនឹងបន្ដរួមរស់ជាមួយក្លិប Manchester United ដោយបានអះអាងថា គេពេញចិត្តពេញថ្លើម ចំពោះការលេងរួមក្រុមជាមួយកីឡាករពិសេសដូចជា Cristiano Ronaldo។
Ronaldo បានក្លាយជាវីរបុរសក្នុងការប្រកួតជាថ្មីសម្រាប់ ក្រុមបិសាចក្រហម ក្នុងការវាយបកយកឈ្នះលើ Atalanta ដោយលទ្ធផល ៣-២ ក្នុងវគ្គចែកពូល UEFA Champions League កាលពីយប់ថ្ងៃពុធកន្លងទៅ។
បច្ចុប្បន្ន Pogba នៅ Man Utd គេនឹងក្លាយជាកីឡាករដែលគ្មានតម្លៃខ្លួន នៅដំណាច់រដូវកាលនេះ ហើយគេអាចចុះកុងត្រាជាមួយក្លិបថ្មីបាន នៅខែមករាខាងមុខ។
ប៉ុន្ដែខ្សែបម្រើជនជាតិបារាំង បានបង្ហាញតម្រុយធំមួយ ពាក់ព័ន្ធនឹងអនាគតរបស់ខ្លួន នេះបើយោងតាមសារព៏ត៌មាន talkSPORT បានអះអាងថា Pogba រីករាយនឹងការលេងនៅ Man Utd បន្ដទៀត ដើម្បីលេងរួមក្រុមជាមួយ Ronaldo ដែលបានបានបង្ហាញការតស៊ូមិនបោះបង់ រហូតជួយក្រុមបានជ័យជម្នះ។
នៅពេលសួរនាំពាក់ព័ន្ធនឹងអនាគត Pogba បាននិយាយថា៖ «ខ្ញុំរីករាយនឹងការលេងនៅ Manchester United។ បន្ទាប់ពីនេះគឺ Cristiano Ronaldo, កីឡាករពិសេស ដែលជាកីឡាករល្អបំផុតមួយរូបនៅលើលោក ខ្ញុំពេញចិត្តនឹងលេងជាមួយគាត់»៕
