ការលក់ក្លឹប Newcastle United ទៅឱ្យមូលនិធិវិនិយោគសាធារណៈអារ៉ាប៊ីសាអូឌីត កាលពីថ្ងៃព្រហស្បតិ៍ បាននាំមកនូវទស្សនីយភាពរីករាយនៅ St James’ Park ខណៈដែលអ្នកគាំទ្របានចាប់ផ្តើមសុបិនអំពីអនាគតរបស់ក្លឹបជាលើកដំបូងក្នុងរយៈពេលជាយូរ បន្ទាប់ពី ១៤ឆ្នាំស្ថិតក្រោមការគ្រប់គ្រងរបស់ Mike Ashley។
ទ្រព្យសម្បត្តិរួមនៃមូលនិធិវិនិយោគសាធារណៈអារ៉ាប៊ីសាអូឌីត (Saudi Public Investment Fund) មានចំនួន ៣២០ពាន់លានផោន ប៉ុន្តែទ្រព្យសម្បត្តិសុទ្ធរបស់ Bin Salman ត្រូវបានគេជឿថាមានប្រហែល ១៣ ពាន់លានផោនប៉ុណ្ណោះ។
ខណៈដែលតូលេខនេះគឺនៅពីក្រោយទ្រព្យសម្បត្តិសុទ្ធរបស់ម្ចាស់ក្លឹប Man City លោក Sheikh Mansour ដែលមានចំនួន ១៧ ពាន់លានផោន ប៉ុន្តែ Bin Salman មានទ្រព្យសម្បត្តិរបស់គ្រួសាររាជវង្សអារ៉ាប៊ីសាអូឌីតនៅពីក្រោយគាត់ ដែលទ្រព្យសម្បត្តិសរុបមានរហូតដល់ ១.៣ ទ្រីលានផោន។
សរុបមកវិញ បើប្រៀបធៀបទ្រព្យសម្បត្តិរបស់គ្រួសារ មានន័យថា ម្ចាស់ក្លឹប Manchester City ចាញ់ម្ចាស់ថ្មីរបស់ Newcastle ព្រោះគ្រួសាររាជវង្ស Abu Dhabi មានទ្រព្យសម្បត្តិសុទ្ធត្រឹមតែ ៥០០ ពាន់លានផោនប៉ុណ្ណោះ៕
