ខ្សែការពារស្លាបឆ្វេងរបស់ក្រុមបិសាចក្រហម Manchester United កីឡាករ Luke Shaw ជឿជាក់ថាមិត្តរួមក្រុម Cristiano Ronaldo គឺជាកីឡាករបាល់ទាត់លំដាប់ពិភពលោក ហើយបានកោតសរសើរពីស្មារតីចង់ឈ្នះរបស់គាត់ចំពោះគ្រប់ការប្រកួត។
ថ្លែងទៅកាន់ TalkSPORT មុនការប្រកួតរបស់អង់គ្លេសទល់នឹងអង់ដូរ៉ា Luke Shaw បាននិយាយថាវាជាភាពអស្ចារ្យមួយដែលមានកីឡាករម្នាក់ដូចជា Cristiano Ronaldo នៅក្នុងក្រុម ដែលគាត់ពោរពេញដោយបទពិសោធន៍។ Shaw បាននិយាយថា៖ «គាត់មានកម្រិតលេងដែលខ្ពស់ ហើយខ្ញុំគ្មានចម្ងល់ទេថា ហេតុអ្វីបានជាគាត់ក្លាយជាកីឡាករល្អបំផុតម្នាក់នៅលើពិភពលោក ក្នុងរយៈពេល ១០ឆ្នាំចុងក្រោយនេះ។ របៀបដែលគាត់គ្រប់គ្រងខ្លួនឯង បទដ្ឋានដែលគាត់បានកំណត់ និងចិត្តគំនិតរបស់គាត់គឺល្អបំផុតតាមដែលខ្ញុំបានមើលឃើញ» ។
Shaw បានបន្ថែមថា៖ « វាល្អសម្រាប់យើងក្នុងនាមជាមិត្តរួមក្រុម ដែលត្រូវបានហ៊ុំព័ទ្ធដោយមនុស្សល្អបែបនេះ។ គ្រប់ទីកន្លែងដែលគាត់ទៅ គាត់បានឈ្នះ ហើយនោះហើយជាមូលហេតុពីព្រោះស្តង់ដារដែលគាត់កំណត់គឺខ្ពស់ណាស់»។
Luke Shaw បានកោតសរសើរចំពោះចលនា និងភ្នែករបស់ Cristiano Ronaldo ចំពោះការគ្រាប់បាល់ ដែលតែងតែឃើញគាត់នៅក្នុងជំហរត្រឹមត្រូវ ដើម្បីរកគ្រាប់បាល់។ ខ្សែការពារវ័យ ២៦ឆ្នាំរូបនេះ បានដាក់ហៅអ្នកឈ្នះពានរង្វាន់ Ballon d’Or ៥ សម័យថាជា «កំពូលកីឡាករលំដាប់ពិភពលោក»។ Ronaldo គាត់មានភាពមុតស្រួច តែងតែស្ថិតក្នុងទីតាំងត្រឹមត្រូវ ដើម្បីរកគ្រាប់បាល់ ហើយចលនារបស់គាត់គឺល្អបំផុត ដែលខ្ញុំមិនធ្លាប់បានឃើញ។ វាមិនមែនជារឿងភ្ញាក់ផ្អើលទេដែលគាត់រកគ្រាប់បាល់បញ្ចូលទី ហើយគាត់បានធ្វើវាអស់ជាច្រើនឆ្នាំមកហើយ ព្រោះគាត់តែងតែនៅកន្លែងដែលត្រឹមត្រូវ ជាមួយនឹងពេលសមស្រប នោះគឺជាសញ្ញាវិជ្ជមានរបស់កំពូលកីឡាករលំដាប់ពិភពលោក៕
