ពិតណាស់ ចាប់តាំងពីបានមកជាន់ទឹកដីអ៊ីតាលីមក Tammy Abraham ហាក់ទទួលបានភាពលេចធ្លោខ្លាំង បន្ទាប់ពីស៊ុតបាល់បញ្ចូលទី ៤គ្រាប់មកហើយ ក្នុងការបង្ហាញខ្លួន ១០ប្រកួត សម្រាប់ក្រុម Roma ក្រោយបញ្ចប់ការផ្ទេរក្នុងតម្លៃខ្លួនប្រមាណ ៣៤លានផោនពី Stamford Bridge នៅអំឡុងទីផ្សារដោះដូរកីឡាកររដូវក្កៅនេះ ។
យ៉ាងណាមិញ ដោយនិយាយអំពីការសម្រេចចិត្តចាកចេញពីក្លិប Chelsea ក្រោយចំណាយពេលជាងមួយទសវត្សរ៍នៅទីនោះ ខ្សែប្រយុទ្ធសញ្ជាតិអង់គ្លេសរូបនេះ បានពន្យល់ប្រាប់ពីមូលហេតុថា ៖ «ខ្ញុំមានជម្រើសផ្សេងៗគ្នា» ។
គេបន្តទៀតថា ៖ «មានក្លឹបជាច្រើន ដែលខ្ញុំកំពុងស្ថិតនៅក្នុងការពិភាក្សាជាមួយនៅពេលនោះ ។ ហើយស្រាប់តែក្រុមនៅអ៊ីតាលី បានចូលរួមដែរ ខ្ញុំបាននិយាយជាមួយលោក Jose គាត់ចង់នាំ Roma ទៅទៅរកភាពជោគជ័យថ្មី ហើយគាត់ចង់បានខ្ញុំឲ្យក្លាយជាផ្នែកមួយនៃដំណើរការនេះ ។ គាត់ពិតជាជឿជាក់លើខ្ញុំ ដូច្នេះគាត់ពិតជាជះឥទ្ធិពលយ៉ាងខ្លាំង ទៅលើមូលហេតុដែលខ្ញុំសម្រេចចិត្តជ្រើសរើសយក Roma» ។
រឿងដំបូងដែលគាត់និយាយមកខ្ញុំ គឺនៅពេលខ្ញុំខលទូរស័ព្ទជាមួយគាត់ ដោយគាត់លើកឡើងថា «តើអ្នកចង់ទទួលបានពន្លឺព្រះអាទិត្យខ្លះទេ ឬមួយស្ថិតនៅក្រោមទឹកភ្លៀងរហូត?» ហើយខ្ញុំ បាន សើច ៕
