លោក Park Ji-Sung បានស្នើឱ្យអ្នកគាំទ្រក្រុមបិសាចក្រហម Manchester United បញ្ឈប់ការច្រៀងចំរៀងនេះ ព្រោះវាមានការប្រមាថជាតិសាសន៍ដល់ប្រជាជនកូរ៉េ។
អតីតខ្សែបម្រើរបស់ក្រុមបិសាចក្រហមរូបនេះ បាននិយាយថា គាត់ដឹងថាអ្នកគាំទ្រមិនចង់បង្កឱ្យមានការអាក់អន់ចិត្ត ដោយរួមបញ្ចូលទាំងការលើកឡើងពីជនជាតិកូរ៉េ ដែលហូបសាច់ឆ្កែ ប៉ុន្តែគាត់និយាយថា គាត់ចង់អប់រំអ្នកគាំទ្រអំពីមូលហេតុដែលប្រើពាក្យនេះ វាធ្វើឱ្យគាត់ និងជនរួមជាតិរបស់គាត់ឈឺចាប់។
គួររំលឹកថា Ji-Sung បាននិយាយបែបនេះ បន្ទាប់ពីគាត់បានលឺអ្នកគាំទ្រច្រៀងចំរៀងនៅ Molineux ក្នុងខែសីហានៅពេលដែល Wolverhampton Wanderers បានបង្ហាញពីការចុះហត្ថលេខាថ្មីរបស់ពួកគេគឺ Hwang Hee-chan ។
ដោយលោកថា៖”ខ្ញុំពិតជាសុំឱ្យអ្នកគាំទ្រឈប់ច្រៀងពាក្យនេះ។ វាបង្កឱ្យមានភាពមិនស្រួលចិត្តដល់ប្រជាជនកូរ៉េ នៅពេលពួកគេលឺបទចំរៀងនោះ”។
ជាមួយគ្នានោះដែរ ក្រុមបិសាចក្រហម Manchester United បាននិយាយថា ពួកគេគាំទ្រយ៉ាងពេញទំហឹងចំពោះសំណើរបស់ Park ហើយសុំឱ្យអ្នកគាំទ្រគោរពតាមបំណងប្រាថ្នារបស់គាត់។
សូមបញ្ជាក់ថា អតីតខ្សែបម្រើកូរ៉េខាងត្បូងវ័យ ៤០ឆ្នាំរូបនេះ បានចំណាយពេល ៧ ឆ្នាំនៅ Old Trafford ចន្លោះឆ្នាំ ២០០៥ និង ២០១២ ជាកន្លែងដែលគាត់ឈ្នះពានរង្វាន់ Premier League ៤ ដង Champions League និង League Cup បីដង។ បន្ទាប់ពីចាក ចេញគាត់មានការងារនៅ QPR និង PSV Eindhoven មុនពេលគាត់ចូលនិវត្តន៍នៅឆ្នាំ ២០១៤៕
