លោក Richard Eckersley ធ្លាប់ជាខ្សែការពារដ៏ជោគជ័យម្នាក់ នៅក្រុមបិសាចក្រហម Manchester United ប៉ុន្តែអតីតកីឡាកររូបនេះបានសារភាពថា គាត់បានចេញពីហ្វឹកហាត់ជាមួយ Cristiano Ronaldo ដើម្បីលក់ទឹកដោះគោវិញ។
Eckersley បាននិយាយលម្អិតនៅក្នុងបទសម្ភាសន៍ជាមួយ The Athletic ថា“ ខ្ញុំបានត្រលប់មកពី Oldham ដើម្បីរៀបការ និងបង្កើតបានកូនម្នាក់ ទាំងគ្មានសល់ប្រាក់ និងក្តីសង្ឃឹម ហើយខ្ញុំបានប្រាប់ប្រពន្ធខ្ញុំថា ខ្ញុំចង់ឈប់ពីបាល់ទាត់” ។
លោកបន្តថា “ខ្ញុំតែងតែគិតអំពី Cristiano Ronaldo ត្រលប់មក Old Trafford វិញជាលើកចុងក្រោយដែលគាត់នៅទីនោះ ខ្ញុំបានហ្វឹកហាត់ជាមួយគាត់ ហើយឥឡូវនេះខ្ញុំជាអ្នកផលិតទឹកដោះគោ ហើយខ្ញុំលក់ទឹកដោះគោជូរ” ។ យើងកំពុងផលិតទឹកដោះគោចំនួន ២៥.០០០ លីត្រក្នុងមួយខែ ជាមួយបុគ្គលិក ២២នាក់ ហើយយើងចង់ក្លាយជាអ្នកចែកចាយទឹកដោះគោធំជាងគេនៅចក្រភពអង់គ្លេស ក្នុងរយៈពេល ៥ឆ្នាំខាងមុខនេះ” ។
គួររំលឹកថា អតីតខ្សែការពារអង់គ្លេសវ័យ ៣២ឆ្នាំរូបនេះ បានបង្ហាញខ្លួនជាលើកដំបូងសម្រាប់ក្រុម Man United ក្នុងឆ្នាំ ២០០៩ ហើយការប្រកួតអាជីពចុងក្រោយរបស់គាត់ បានកើតឡើងក្នុងឆ្នាំ ២០១៥ ជាមួយ Oldham Athletic ៕
