អ្នកចាត់ការទូទៅក្រុមតោខៀវលោក Thomas Tuchel និយាយថា Christian Pulisic ទំនងជាមិនមានវត្តមានក្នុងក្រុម Chelsea ក្នុងការប្រកួត Carabao Cup នៅថ្ងៃពុធនេះទេ ខណៈដែលរូបគេនៅតែបន្តព្យាបាលរបួសកជើង។
លោក Tuchel ត្រូវបានបញ្ជាក់អំពីរបួសរបស់ខ្សែបម្រើប្រយុទ្ធអាមេរិករូបនេះ នៅក្នុងការប្រកួតជម្រុះ World Cup កាលពីដើមខែនេះ បន្ទាប់ពីក្រុមតោខៀវបានយកឈ្នះក្រុម Tottenham ៣-០ កាលពីថ្ងៃអាទិត្យ។
យ៉ាងណាមិញ Pulisic នៅមិនទាន់បានចូលរួមក្នុងការហ្វឹកហាត់នៅឡើយទេ ប៉ុន្តែលោក Tuchel បានបង្ហើបឲ្យដឹងថា កីឡាករវ័យ២៣រូបនេះ ប្រហែលអាចចូលលេងបានវិញនៅចុងសប្តាហ៍ក្រោយ ក្នុងពេលឆាប់ៗនេះ។
បញ្ជាក់ផងដែរថា ក្រុមតោខៀវ Chelsea នឹងត្រូវប្រកួតម្តងទៀតនៅថ្ងៃពុធនេះ ដោយត្រូវជួបក្រុម Aston Villa ក្នុងពានរង្វាន់ Carabao Cup នៅកីឡដ្ឋាន Stamford Bridge ៕
