Romelu Lukaku អាចធ្វើត្រាប់តាម Didier Drogba ដែលអាចនាំក្រុមតោខៀវ Chelsea ទៅកាន់ក្របខ័ណ្ឌ Premier League និង Champions League នេះបើយោងតាមលោក Joe Cole អតីតកីឡាករ Stamford Bridge។
Cole បាននិយាយនៅ BT Sport ថា “ប្រាកដណាស់ពួកគេស្រដៀងគ្នា វាមិនមែនគ្រាន់តែជាអ្វីដែលគាត់នាំមកនៅលើទីលាននោះទេ។ ខ្ញុំគិតថា Lukaku បានរៀនសូត្រច្រើនពី Didier ទាក់ទងនឹងវត្តមានរបស់គាត់នៅក្រៅទីលាន។ គ្រប់សកម្មភាព ការគោរពវីន័យ ទាំងនៅក្នុងក្រុម គាត់គឺជាអ្នកដឹកនាំ ហើយនោះគឺជា Didier Drogba។
ខ្សែប្រយុទ្ធប៊ែលហ្សិកវ័យ ២៨ឆ្នាំរូបនេះ បានចាប់ផ្តើមជីវិតដ៏អស្ចារ្យឡើងវិញ នៅទឹកដីអង់គ្លេសបន្ទាប់ពីការផ្ទេររបស់គាត់ក្នុងទំហំទឹកប្រាក់ចំនួន ៩៨ លានផោន (១៣៦ លានដុល្លារ) ពីក្លិប Inter Milan។
រហូតមកដល់ពេលនេះ Lukaku បានស៊ុតបាល់បញ្ចូលទីចំនួន ៤ គ្រាប់ក្នុងការបង្ហាញខ្លួនចំនួន ៤ លើករួមទាំង ២ គ្រាប់ក្នុងជ័យជម្នះលើក្រុម Aston Villa កាលពីថ្ងៃសៅរ៍ ហើយនៅយប់ថ្ងៃអង្គារគាត់បានបង្ហាញខ្លួនជាលើកដំបូងក្នុងក្របខ័ណ្ឌ Champions League របស់ខ្លួនសម្រាប់ក្រុមតោខៀវ នៅក្នុងការប្រកួតជាមួយក្រុម Zenit St Petersburg ព្រមទាំងរកបាន ១គ្រាប់ផងដែរ៕
