ក្លឹបហង្សក្រហម Liverpool គ្រោងចរចានាំយកកីឡាករ ដែលមិនសូវបានជាប់ជម្រើសដំបូងរបស់ក្លឹប Real Madrid ម្នាក់ ផ្ទេរមក Anfield នៅទីផ្សារដោះដូរនាពេលបន្ទាប់។
ខ្សែប្រយុទ្ធ Marco Asensio ដែលគេបានចាយពេលនៅ Real Madrid តាំងពីឆ្នាំ ២០១៥ តែនៅប៉ុន្មានឆ្នាំចុងក្រោយ គេហាក់ខ្សត់ឱកាសក្នុងការបង្ហាញខ្លួន ពោលបានត្រឹមតែអង្គុយកៅអីបម្រុងតែប៉ុណ្ណោះ។ បច្ចុប្បន្នសុពលភាពកុងត្រារបស់កីឡាករអេស្ប៉ាញ ត្រូវផុតនៅចុងខែមិថុនា ឆ្នាំ ២០២៣។
សារព័ត៌មាន todofichajes បានឲ្យដឹងថា ហង្សក្រហមបាននឹងកំពុងចាប់ចិត្តលើ Asensio ហើយចង់ឆ្លៀតឱកាស ពេលកីឡាករមិនសូវទទួលបានឱកាសលេង ចូលទៅអូសទាញចិត្តគេឲ្យព្រមដើរចេញ ពីក្លឹបនៅទីក្រុង Madrid។
ប្រភពដដែលបន្ថែមថា ក្លឹបកំពុងរៀបចំសំណើដំបូងនៅទឹកប្រាក់ ៣៥ លានអឺរ៉ូ ដាក់ទៅកាន់ភាគីក្លឹប Real Madrid ដែលតម្លៃនេះនៅតែចំណេញ ព្រោះកាល Real ទិញពី Mallorca ក្លឹបចាយមិនដល់ ៤ លានអឺរ៉ូផង។
គួរបញ្ជាក់ថា ជាងកន្លះទសវត្សមកនេះ Asensio បានឈរជើងសរុបឲ្យ Real Madrid បាន ១៩៦ ប្រកួត រកបាន ៣៧ គ្រាប់ និង Assist ២២ លើក។ ភាគរយច្រើនដែលក្លឹបដឹកនាំដោយលោក Carlo Ancelotti អាចនឹងលៃលកលក់គេចេញ ព្រោះដើម្បីប្រមូលលុយទុកត្រៀម ផ្គត់ផ្គង់ថ្លៃពលកម្មកប់ពពក ឲ្យកីឡាករគោលដៅគឺ Kylian Mbappe៕
