កាលពីពេលថ្មីៗនេះ ក្លឹបអ៊ីតាលី Fiorentina ត្រូវបានគេរាយការណ៍ថា កំពុងកៀកចុះកុងត្រាជាមួយខ្សែការពារក្រុមតោខៀវ Chelsea មួយរូបគឺ កីឡាករ Davide Zappacosta។
បើតាមរបាយការណ៍ពី The sun បានឲ្យដឹងថា Fiorentina បានចាត់ទុក Zappacosta ជាកីឡាករគោលដៅធំបំផុតសម្រាប់រដូវកាលនេះ ស្របពេលបច្ចុប្បន្ន ភាគីទាំងសងខាងកំពុងចរចាលើកិច្ចសន្យាផ្សេងៗ ហើយក៏កៀកនឹងការចុះហត្ថលេខាជាផ្លូវការផងដែរ។
យ៉ាងណាមិញ ប្រភពខាងលើក៏និយាយដែរថា ការផ្ទេរខ្សែការពារវ័យ ២៩ ឆ្នាំពី Chelsea មកបាន គឺអាស្រ័យទៅលើ Pol Lirola ប៉ុណ្ណោះ ចំណែកឯ Lirola គឺកំពុងកៀកការផ្ទេរទៅ Marseille ដូច្នេះទើបក្លឹបនៅអ៊ីតាលីចង់បាន Zappacosta មកជំនួសតំណែងខ្សែការពារអេស្ប៉ាញនេះ។
ប្រភពខាងលើបន្ថែមថា Fiorentina បានទារតម្លៃខ្លួន Lirola ពី Marseille ចំនួន ១២ លានអឺរ៉ូ ខណៈតម្លៃផ្ទេរ Zappacosta ពី Chelsea នៅមិនទាន់ទម្លាយនៅឡើយទេ៕
