ក្លិបអេស្ប៉ាញ Real Sociedad បានចុះកិច្ចសន្យាមួយ ជាមួយកីឡាករអ្នកចាំទី Mat Ryan សញ្ជាតិអូស្ត្រាលី មកពីក្លិប Brighton & Hove Albion ដែលលេងនៅលីគ English Premier League ក្នុងកិច្ចសន្យារយៈពេល២ឆ្នាំ។
បន្ទាប់ពីចំណាយរយៈពេល៤ឆ្នាំ នៅក្លិប Brighton & Hove Albion កីឡាករវ័យ២៩ឆ្នាំរូបនេះ បានវិលត្រឡប់ទៅលេងនៅអេស្ប៉ាញវិញ ខណៈលោកធ្លាប់លេងឲ្យក្លិប Valencia របស់អេស្ប៉ាញ ក្នុងកិច្ចសន្យា៣ឆ្នាំ (២០១៥-២០១៧)។
Ryan គឺជាកីឡាករជើងចាស់ ដែលធ្លាប់បានចូលរួម ក្នុងព្រឹត្តិការណ៍បាល់ទាត់ពិភពលោក World Cup នឹងបានជួយឲ្យក្រុមជម្រើសជាតិអូស្ត្រាលី ទទួលបានជោគជ័យ ជាបន្តបន្ទាប់លើកទី៨ ក្នុងវគ្គជម្រុះអាស៊ី សម្រាប់ការប្រកួតឆ្នាំ២០២២ នៅប្រទេសកាតា ជាមួយនឹងការឈ្នះ ១-០ លើក្រុមហ្សកដានី កាលពីខែមុន៕
