យោងតាមសារព័ត៌មាន The Express បានឲ្យដឹងថា ក្រុមបិសាចក្រហម Manchester United បានយល់ព្រមលើលក្ខខណ្ឌផ្ទាល់ខ្លួនជាមួយ Raphael Varane ហើយខ្សែការពារកណ្តាលសញ្ជាតិបារាំងរូបនេះ ជាគោលដៅចំបងរបស់បិសាចក្រហម សម្រាប់ទីផ្សារផ្ទេរកីឡាករនៅរដូវក្តៅនេះ។
កិច្ចព្រមព្រៀងបច្ចុប្បន្នរបស់ Varane ជាមួយ Real Madrid នឹងផុតកំណត់ក្នុងរយៈពេលមួយឆ្នាំទៀត ហើយខ្សែការពាររូបនេះមិនទាន់បន្តកុងត្រានៅឡើយទេ។ Los Blancos ពិតជាអស់សង្ឃឹមក្នុងការរក្សារូបគេ ប៉ុន្តែកីឡាករបារាំងរូបនេះចង់ស្គាល់រសជាតិការប្រកួតប្រជែងថ្មីជាមួយក្របខណ្ឌ Premier League ។
ក្រុមបិសាចក្រហម Manchester United បានស្ញប់ស្ញែងកីឡាករបារាំងនេះជាយូរមកហើយ ព្រមទាំងបានព្យាយាមបញ្ចុះបញ្ចូលរូបគេឲ្យផ្លាស់មកកាន់ទឹកដី Old Trafford នារដូវក្តៅនេះ។ បិសាចក្រហមបានផ្តល់ជូនកីឡាកររូបនេះនូវតម្លៃខ្លួន ១០ លានផោនក្នុងមួយឆ្នាំ ហើយ Varane ក៏បានយល់ព្រម។
កីឡាករសញ្ជាតិបារាំងរូបនេះត្រូវបានគេរាយការណ៍ថា អនាគតរបស់គាត់នឹងត្រូវកំណត់នៅក្នុងរយៈពេល ២ ខែទៀត ដូច្នេះគាត់អាចមានលទ្ធភាព ចូលរួមក្នុងការហ្វឹកហាត់មុនបើករដូវកាល ជាមួយក្រុមយក្សនៅ Premier League។ Real Madrid ទាមទាតម្លៃប្រហែល ៤៨ លានផោន សម្រាប់ខ្សែការពាររបស់ពួកគេ។ ទោះយ៉ាងណាក្រុម Manchester United មិនមានឆន្ទៈចំណាយប្រាក់ច្រើន សម្រាប់កីឡាករម្នាក់ក្នុងរយៈពេល ១២ ខែចុងក្រោយនៃកិច្ចសន្យារបស់គេឡើយ៕
