ខ្សែបម្រើរបស់ក្លិបអធិរាជស Toni Kroos បានប្រកាសចូលនិវត្តពីក្រុមជម្រើសជាតិអាល្លឺម៉ង់ បន្ទាប់ពីការប្រកួតចាញ់ក្រោមថ្វីជើងក្រុមតោកំណាចអង់គ្លេស ២-០ ក្នុងវគ្គ១៦ក្រុមចុងក្រោយនៅ EURO 2020។
ជាការពិតណាស់ អតីតកីឡាកររបស់ Bayern Munich រូបនេះ នឹងគ្មានវត្តមានលើទីលានប្រកួតសម្រាប់ក្រុមឥន្ទ្រីយ៍ដែកអាល្លឺម៉ង់ ក្នុងការប្រកួតបាល់ទាត់ពិភពលោក FIFA World Cup 2022 ដែលនឹងធ្វើនៅប្រទេសកាតារ ឡើយ។
Kroos បានសរសេរសារមួយ ដែលរៀបរាប់ពីការបញ្ចប់អាជីពដ៏ជោគជ័យរបស់ខ្លួន សម្រាប់ក្រុមជម្រើសជាតិ ដោយគេបានរួមចំណែកជួយក្រុមលោក Joachim Low ឈ្នះ World Cup 2014 នៅប្រទេសប្រេស៊ីល។
ខ្សែបម្រើអាល្លឺម៉ង់វ័យ ៣១ឆ្នាំរូបនេះ បានបង្ហាញខ្លួនក្នុងក្រុមធំជម្រើសជាតិអាល្លឺម៉ង់ក្នុងឆ្នាំ ២០១០ ទល់នឹងអាហ្សង់ទីន ដែលជាក្រុមបរាជ័យទល់នឹងអាល្លឺម៉ង់ ក្នុងវគ្គផ្ដាច់ព្រ័ត្រ World Cup 2014 ហើយគេស្ថិតនៅក្នុងជម្រើសដែលមិនអាចខ្វះបាននៅក្នុងក្រុមជម្រើសជាតិចាប់តាំងពីពេលនោះមក៕
