ក្លិបអធិរាជស Real Madrid បានប្រកាសជាផ្លូវការថា ខ្សែការពារ Sergio Ramos នឹងចាកចេញពីក្លិបនៅរដូវក្ដៅនេះដោយគ្មានតម្លៃខ្លួន បន្ទាប់ពីចំណាយពេល១៦ឆ្នាំនៅទឹកដី Santiago Bernabeu ហើយនឹងមានរៀបចំពិធីលាគ្នាជាផ្លូវការនៅថ្ងៃព្រហស្បត្តិ៍នេះ។
សូមជម្រាបថា Ramos នឹងអស់សុពុលភាពកុងត្រាជាមួយក្លិបនៅចុងខែមិថុនានេះហើយ ដោយមិនមានការបន្តកុងត្រាថ្មីទេ បើទោះបីជាកន្លងមក Real Madrid បានស្នើកុងត្រាថ្មីដល់កីឡាករសញ្ជាតិអេស្ប៉ាញរូបនេះចំនួន១ឆ្នាំ អមជាមួយការកាត់ប្រាក់ឈ្នួល១០ភាគរយក៏ដោយ ខណៈដែល Ramos ទាមទារកុងត្រាចំនួន២ឆ្នាំ។
Sergio Ramos បានចូលលេងដល់ទៅ៦៧១ប្រកួត និងរកបាន១០១គ្រាប់ ក្រោយផ្ទេរពី Sevilla មក Real Madrid ក្នុងឆ្នាំ២០០៥ ដោយគេបានដឹកនាំក្រុមឈ្នះពាន La Liga ៥ដង ,Champions League ៤ដង និង Copa Del Rey ២ដង ឯសម្រាប់ជម្រើសជាតិអេស្ប៉ាញវិញ គឺគេបានបង្ហាញខ្លួនដល់ទៅ១៨០ប្រកួត ក្លាយជាកីឡាករដែលលេងឲ្យជម្រើសជាតិអេស្ប៉ាញ បានច្រើនបំផុតក្នុងប្រវត្តិសាស្ត្រ។
យ៉ាងណាមិញ គេមិនទាន់ច្បាស់ទេថា Ramos អាចនឹងទៅចូលរួមជាមួយក្លិបណាបន្តទៀត ប៉ុន្តែកន្លងមកមានក្លិប Manchester United ,Manchester City និង Paris Saint-Germain ចាប់អារម្មណ៍លើរូបគេ ស្របពេល Real Madrid មានខ្សែការពារមកជំនួសកីឡាករវ័យ៣៤ឆ្នាំនេះហើយ គឺខ្សែការពារ David Alaba ដែលផ្ទេរមកដោយគ្មានតម្លៃខ្លួនពី Bayern Munich៕
