ខ្សែបម្រើប្រយុទ្ធក្រុមជម្រើសជាតិប៊ែលហ្សិក Kevin de Bruyne នឹងខកខាន ១ប្រកួតបើកឆាកពានអឺរ៉ុប Euro 2020 ជាមួយក្រុមជម្រើសជាតិរុស្ស៊ី នៅរាត្រីម៉ោង ២:០០ រំលងអធ្រាត្រយប់នេះ (ម៉ោងនៅកម្ពុជា) ដោយសារបញ្ហារបួសច្រមុះ និងភ្នែកពុំទាន់ជាសះស្បើយស្រួលបួល។
ជាការពិតណាស់ របួសច្រមុះ និងភ្នែករបស់ខ្សែប្រយុទ្ធវ័យ ២៩ឆ្នាំរូបនេះ បានរងរបួសកំឡុងប្រកួតផ្តាច់ព្រ័ត្រពាន UEFA Champions League ទល់នឹង Chelsea កាលចុងខែឧសភាមកនោះ បានអូសបន្លាយដល់កីឡាករនៃក្លិបមេឃខៀវ Manchester City ពុំទាន់ជាសះស្បើយ ១០០%ឡើយ។
យ៉ាងណាមិញ ក្រៅពី De Bruyne អវត្តមាន ខ្សែបម្រើដូចគ្នាមកពីក្លិប Borussia Dortmund, Axel Witsel ក៏នឹងខកខានប្រកួតដំបូងដូចគ្នា ជាមួយក្រុមរបស់លោក Roberto Martinez ដោយសារមានបញ្ហាជំងឺផ្តាសាយ គ្រាដែលខ្សែបម្រើរុស្ស៊ី Andrei Mostovoy បានតេស្តវិជ្ជមាននៃជំងឺ COVID-19៕
