ភ្នំពេញ៖ គណៈគ្រប់គ្រងនៃសណ្ឋាគារ ឋានសួគ៌សុខា បានសម្រេចមិនអនុញ្ញាតឲ្យភ្ញៀវជាតិ និងអន្តរជាតិទាំងអស់ យកម្ហូបអាហារទៅទទួលទាន និងឈប់សម្រាកលំហែកាយ នៅតាមដងវិថីឡើងលើភ្នំបូកគោ ដោយហេតុថាក្រុមហ៊ុន កំពុងប្រឈមមុខយ៉ាងធ្ងន់ធ្ងរ នឹងបញ្ហាប្រមូលសំរាម ។
យោងតាមសេចក្ដីជូនដំណឹង របស់គណៈគ្រប់គ្រងសណ្ឋាគារ ឋានសួគ៌សុខា កាលពីថ្ងៃទី២១ ខែកក្កដា ឆ្នាំ២០២០ បានឲ្យដឹងថា បច្ចុប្បន្ននេះ ក្រុមហ៊ុនប្រឈមមុខយ៉ាងធ្ងន់ធ្ងរ ក្នុងការប្រមូលសម្រាមដែលមានក្លិនស្អុយ ឆ្អេះឆ្អាប រាយរយគីឡូ និងពេលខ្លះរហូតដល់រាប់តោន ជាពិសេសរាល់ថ្ងៃចុងសប្ដាហ៍ ។
គណៈគ្រប់គ្រងបន្តថា អាស្រ័យហេតុនេះ ក្រុមហ៊ុនសូមអធ្យាស្រ័យ និងសុំការយោគយល់ ពីសំណាក់ភ្ញៀវជាតិ និងអន្តរជាតិទាំងអស់ថា ចាប់ពីថ្ងៃទី១៥ ខែសីហា ឆ្នាំ២០២០ ក្រុមហ៊ុនចាប់ផ្ដើមរឹតបន្តឹង លើការគ្រប់គ្រងបរិស្ថានដូចខាងក្រោម៖
១.មិនអនុញ្ញាតឲ្យភ្ញៀវជាតិ និងអន្តរជាតិទាំងអស់ យកម្ហូបអាហារ ឡើងលើភ្នំបូកគោទៀតឡើយ ។
២.មិនអនុញ្ញាតឲ្យទទួលទាន ម្ហូបអាហារ នៅតាមដងវិថី និងទីសំរាកលំហែរសាធារណៈនានា នៅលើភ្នំបូកគោ ៕
