ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា បានលើកឡើងថា សម្ដេចនឹងស្នើសុំទៅកាន់ អង្គការសហប្រជាជាតិ (UN) ឲ្យពន្យារពេលផ្លាស់ប្ដូរកងទ័ពមួកខៀវ ដែលកំពុងបំពេញបេសកកម្ម ស្វែងរកសន្តិភាពនៅក្រៅប្រទេស ដើម្បីទប់ស្កាត់ការរីករាលដាល នៃជំងឺកូវីដ១៩ ។
ក្នុងពិធីបើកសម្ពោធសួនទឹក «ហ្គាឌិនស៊ីធី» របស់ឧកញ៉ា លី យ៉ុងផាត់ ស្ថិតនៅសង្កាត់ព្រែកតាសេក ខណ្ឌជ្រោយចង្វា នៅព្រឹកថ្ងៃទី១៦ សីហានេះ សម្ដេចតេជោ ហ៊ុន សែន បានមានប្រសាសន៍ថា នៅពេលខាងមុខ កងកម្លាំងមួកខៀវកម្ពុជាចំនួន ៤០០នាក់ នឹងត្រូវផ្លាស់ប្តូរ បញ្ហានេះកម្ពុជាបានស្នើទៅ អគ្គលេខាធិការអង្គការសហប្រជាជាតិ សុំឲ្យពន្យារពេលការផ្លាស់ប្តូរ កងកម្លាំងមួកខៀវកម្ពុជា ដែលកំពុងបំពេញ បេសកកម្មស្វែងរកសន្តិភាព នៅបណ្ដាប្រទេសនានាដូចជា ម៉ាលី លីបង់ អាហ្វ្រិកកណ្តាល និងស៊ូដង់ជាដើម ។
សម្ដេចបន្ថែមថា កន្លងមកក្នុងចំណោមកងទ័ពមួកខៀវ ៨០នាក់ ដែលបានបញ្ចប់បេសកកម្ម រក្សាសន្តិភាពនៅក្រៅប្រទេស មានទ័ពខៀវ ៩នាក់ឆ្លងកូវីដ១៩ ។ សម្ដេចថា បន្ទាប់ពីបានដាក់ពួកគាត់ ឲ្យនៅដាច់ដោយឡែក ១៤ថ្ងៃហើយ ក៏ឲ្យត្រឡប់ទៅផ្ទះវិញ ក៏ស្រាប់តែមានករណីកើតជំងឺកូវីដ១៩ លើកងទ័ពមួកខៀវជានារីម្នាក់ នៅខេត្តកណ្តាល ជាហេតុនាំឲ្យមានការហៅ កងទ័ពមួកខៀវដទៃទៀត ដែលជាអ្នករួមដំណើរជាមួយ វិលមកធ្វើចត្តាឡីស័ក វិញជាបន្ទាន់ផងដែរ ៕
