ភ្នំពេញ៖ កម្លាំងសមត្ថកិច្ចខេត្តសៀមរាប កាលពីថ្ងៃទី១៤ ខែសីហា ឆ្នាំ២០២០ បានឃាត់ខ្លួនជនសង្ស័យម្នាក់ ក្រោយចូលទៅឃាត់ប្ដីប្រពន្ធគេឈ្លោះគ្នា ហើយត្រូវបុរសជាប្ដីវ៉ៃ ២ដៃ ភ្លាមៗបុរសជាជនសង្ស័យមិនសុខចិត្ត ក៏ទាញកាំបិតកាប់វិញ បណ្ដាលឲ្យរងរបួសធ្ងន់ ។
ជនសង្ស័យមានឈ្មោះ ចេង ចិត្ត ភេទប្រុស អាយុ៣៦ឆ្នាំ មុខរបរ កម្មករ មានទីលំនៅបច្ចុប្បន្នភូមិអារញ្ញ សង្កាត់សៀមរាប ក្រុង-ខេត្តសៀមរាប ។
បើតាមនគរបាលបានឲ្យដឹងថា នៅថ្ងៃទី១៣ ខែសីហា ឆ្នាំ២០២០ វេលាម៉ោង ១៦និង០០នាទី ស្ថិតនៅភូមិពោធិ៍បន្ទាយជ័យ សង្កាត់សៀមរាប ក្រុង/ខេត្តសៀមរាប មានករណីហិង្សាដោយចេតនា រវាងអ្នកផឹកស៊ីជុំគ្នា ដោយមូលហេតុទៅឃាត់ប្តីប្រពន្ធ គេកុំឲ្យឈ្លោះគ្នា ។
ជនរងគ្រោះឈ្មោះ សួន សរិទ្ធ ភេទប្រុស អាយុ៣៩ឆ្នាំ មុខរបរ រត់ម៉ូតូឌុប រស់នៅភូមិ/សង្កាត់ខាងលើ បានអង្គុយផឹកស្រាជាមួយជនសង្ស័យឈ្មោះ ចេង ចិត្ត ហើយជនរងគ្រោះក៏បានឈ្លោះប្រកែក និងជេរប្រពន្ធ ។ ពេលននោះឈ្មោះ ចេង ចិត្ត បាននិយាយឃាត់ជនរងគ្រោះមិនអោយជេរប្រពន្ធ ស្រាប់តែជនរងគ្រោះឈ្មោះ សួន សារិទ្ធ បានវ៉ៃទៅលើមុខឈ្មោះ ចេង ចិត្ត ចំនួន០២ដៃ ។ បន្ទាប់ពីវ៉ៃរួច ជនរងគ្រោះបានហៅជនសង្ស័យអោយយកកាំបិតមកកាប់ខ្លួន ។ ដោយនិយាយពាក្យដដែលៗច្រើនដងពេក ជនសង្ស័យក៏បានយកកាំបិត ដែលនៅក្បែរខ្លួនកាប់ទៅលើជនរងគ្រោះ បណ្តាលអោយរងរបួសជាច្រើនកន្លែង ។
ក្រោយកើតហេតុភ្លាម សមត្ថកិច្ចប៉ុស្តិ៍នគរបាលរដ្ឋបាលសង្កាត់សៀមរាប បានចុះទៅដល់កន្លែងកើតហេតុ រួចបញ្ជូនជនរងគ្រោះទៅសង្គ្រោះបន្ទាន់ នៅមន្ទីរពេទ្យបង្អែកខេត្ត ហើយធ្វើការឃាត់ខ្លួនជនសង្ស័យ ឈ្មោះ ចេង ចិត្ត ។
តានការសាកសួររបស់សមត្ថកិច្ច ជនសង្ស័យបានឆ្លើយសារភាពថា រូបគេពិតជាបានធ្វើសកម្មភាព យកកាំបិតកាប់ទៅលើ ជនរងគ្រោះបណ្តាលអោយរងរបួសពិតប្រាកដមែន ។
បច្ចុប្បន្ន ជនសង្ស័យត្រូវបានសមត្ថកិច្ចឃាត់ខ្លួន និងកំពុងកសាងសំណុំរឿង បញ្ជូនទៅសាលាដំបូងខេត្ត ដើម្បីអនុវត្តតាមនីតិវិធីច្បាប់បន្ត ៕
