ភ្នំពេញ៖ លោក យឹម វុទ្ធី ដែលគេស្គាល់ថា មានឋានៈឧត្ដមសេនីយ៍ទោ (ផ្កាយ២) បានប្តឹងលោកយាយ ជង សៀមឆេង អាយុ៦០ឆ្នាំម្នាក់ ដោយចោទប្រកាន់ពីបទ «លួចចិញ្ចៀនពេជ្រ និងជំរិតទារប្រាក់» ។
ក្រោយទទួលបានពាក្យបណ្ដឹង របស់លោកផ្កាយ២ យឹម វុទ្ធី នាយកដ្ឋាននគរបាល ព្រហ្មទណ្ឌក្រសួងមហាផ្ទៃ បានកោះហៅលោកយាយ ជង សៀមឆេង ឲ្យចូលបំភ្លឺ កាលពីថ្ងៃទី២៨ ខែកក្កដា ឆ្នាំ២០២០ ។
ទាក់ទិននឹងបញ្ហានេះដែរ យោងតាមហ្វេសប៊ុកមួយឈ្មោះ «សេង សុវណ្ណ មង្គល» ដែលជាកូនប្រុសលោកយាយ ជង សៀមឆេង កាលពីថ្ងៃទី២៨ កក្កដា បានសរសេរថា «ឯណាយុត្តិធម៌ ! ម្ដាយខ្ញុំរើសបានចិញ្ចៀនកណ្តាលថ្នល់សោះ មិនដឹងថាចិញ្ចៀនបុគ្គលណាទេ តែបែរជាលោកផ្កាយ២ ចោទថា ម្ដាយខ្ញុំជាអ្នកលួចចិញ្ចៀនទៅវិញ ។ រូបភាព មានហើយហេតុអីបាន ថា គ្រួសារខ្ញុំលួចចិញ្ចៀនប្រទេសខ្មែរមានយុត្តិធម៌ទេ សម្រាប់គ្រួសាររបស់ខ្ញុំ តើគ្រួសាររបស់ខ្ញុំទទួលបានយុត្តិធម៌យ៉ាងណា»។
ទន្ទឹមគ្នានោះដែរ ប្អូនស្រីបង្កើតសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា លោកស្រី ហ៊ុន ស៊ីណាត បានលើកឡើងជាមតិយោបល់ ក្នុងហ្វេសប៊ុកដែរថា «បើតាមខ្ញុំមើលភស្តុតាងក្នុង Camera មានជាក់ស្តែង ឃើញនឹងភ្នែកច្បាស់ ប៉ុណ្ណឹង ហើយ លោកផ្កាយ គាត់ហ៊ានប្តឹង ក្នុងលក្ខណៈបំបែកសំណុំរឿងទៀត ។ គួរតែ លោកផ្កាយ ធ្វើការសម្របសម្រួល នឹង លោកយាយ ទើបជាការប្រសើរនិងមានភាពថ្លៃថ្នូរ ក្នុងនាមជាអ្នកមានឋានៈ ក្នុងសង្គមកុំយកផ្កាយមកធ្វើស្រែបុណ្យ ធ្វើបាបរាស្ត្រទន់ខ្សោយបែបនេះមិនល្អទេ» ៕
