ឃាត់ខ្លួនជនជាតិកូរ៉េ ២នាក់ ដកហូតគ្រឿងញៀនជាង ១គីឡូក្រាម (វីដេអូ)

ភ្នំពេញ៖ កម្លាំងជំនាញប្រឆាំងបទល្មើសគ្រឿងញៀន កាលពីថ្ងៃទី២៣ កក្កដា បានចុះបង្ក្រាប និងឃាត់ខ្លួនជនជាតិកូរ៉េខាងត្បូង ២នាក់ ករណីជួញដូរគ្រឿងញៀនឆ្លងដែន ពីកម្ពុជាទៅកូរ៉េ នៅចំណុចមុខអាផាតមិនវីសឌឹម (WISDOM APARTMENT) អគារលេខ១៦ ផ្លូវលេខ៤៤៦ សង្កាត់ទួលទំពូង១ ខណ្ឌចំការមន រាជធានីភ្នំពេញ បន្តទៅឆែកឆេរបន្ទប់ 3D ក្នុងអាផាតមិន WISDOM APARTMENT និងបន្ទប់លេខ F1 E12 ជាន់ទី១២ អផាតមិន DIAMOND HOME1 ដែលបានជួលស្នាក់នៅ ។

ជនសង្ស័យទាំង ២នាក់មានឈ្មោះ ៖ ១- SONG MIN SOO ភេទប្រុស កើតឆ្នាំ១៩៦១ ជនជាតិកូរ៉េ កាន់លិខិតឆ្លងដែនលេខ M717071112 “មានដីកាស្វែងរកចាប់ខ្លួន របស់នគរបាលអន្តរជាតិ (និវេទន៍ក្រហម)” ។ ២-ឈ្មោះ CHOI MIN YOUNG ភេទប្រុស កើតឆ្នាំ១៩៧០ ជនជាតិកូរ៉េ។

វត្ថុតាងសារធាតុញៀន ចាប់បានរួមមាន៖ ១/ប្រភេទមេតំហ្វេតាមីន(ICE) ទម្ងន់ជាង 1389.53g ២/រថយន្ត ១គ្រឿង ៣/ទូរស័ព្ទ ៣គ្រឿង ៤/ជញ្ជីងថ្លឹង ២គ្រឿង និងសម្ភារៈសម្រាប់វេចខ្ចប់ និងលាក់បង្កប់គ្រឿងញៀនមួយចំនួនទៀត។

បច្ចុប្បន្នសង័្សយ ព្រមទាំងវត្ថុតាងចាប់យកខាងលើ សមត្ថកិច្ចជំនាញ បានបញ្ជូនមកមន្ទីរប្រឆាំង បទល្មើសគ្រឿងញៀន ដើម្បីកសាងសំណុំរឿងបញ្ជូន ទៅតុលាការតាមនីតិវិធី ៕