ភ្នំពេញ៖ រយៈពេល២០ថ្ងៃ ចាប់ពីថ្ងៃទី១-២០ ខែមិថុនា ឆ្នាំ២០២០ នៃការរឹតបន្ដឹងច្បាប់ចរាចរណ៍ផ្លូវគោក នគរបាលចរាចរណ៍ឃាត់យានយន្តល្មេីសច្បាប់ចំនួន ២៣០៩៦គ្រឿង ក្នុងនោះមានម៉ូតូចំនួន ១៧១៦៦គ្រឿង ដេីម្បីផាកពិន័យ តាមអនុក្រឹត្យ លេខ៣៩ នៅទូទាំងប្រទេស។
យោងតាមរបាយការណ៍ របស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ បានវាយតម្លៃថា រយៈពេល២០ថ្ងៃ នៃខែមិថុនានេះ ឃើញថា ការអនុវត្តតាមអនុក្រឹត្យថ្មី ក្នុងការផាកពិន័យយានយន្តល្មើស បានដំណើរការទៅយ៉ាងល្អប្រសើរ ទទួលបានការគាំទ្រ ពិសេសអ្នកប្រើប្រាស់ផ្លូវទាំងអស់ បានចូលរួមគោរពច្បាប់ចរាចរណ៍ យ៉ាងល្អប្រសើរ។
ចំពោះការរឹតបន្ដឹងច្បាប់ស្ដីពី ចរាចរណ៍ផ្លូវគោក នៅថ្ងៃទី២០ ខែមិថុនា ឆ្នាំ២០២០ នគរបាលឃាត់យានយន្ដល្មេីសច្បាប់ ចំនួន ៩៥៣គ្រឿង ក្នុងនោះមានម៉ូតូចំនួន៦៦១ គ្រឿង ដេីម្បីផាកពិន័យតាមអនុក្រឹត្យលេខ៣៩ នៅទូទាំងប្រទេស៕
