ភ្នំពេញ: អ្នកតំណាងរាស្ត្រ ហ៊ុន ម៉ានី បានរំលឹកថា ថ្ងៃនេះ ៤៣ឆ្នាំមុន ជាថ្ងៃដែលពុក (សម្ដេចតេជោ ហ៊ុន សែន) បានលាប្រពន្ធ កូន និងប្រជាជនដើម្បីស្វែងរក ការរំដោះប្រទេសជាតិចេញពីរបបកម្ពុជា ប្រជាធិបតេយ្យប្រល័យ ពូជសាសន៍ដ៏យង់ឃ្នង។
អ្នកតំណាងរាស្រ្ត ហ៊ុន ម៉ានី បានរំលឹកតាមរយ:គេហទំព័រហ្វេសប៊ុកនៅថ្ងៃទី២០ មិថុនានេះថា “បេសកកម្មនេះ គឺជាដំណើរផ្សងព្រេងឆ្លងកាត់ ព្រំដែនទៅប្រទេសដទៃ ហើយដែលជាការដាក់ជិវិតធ្វើជាដើមទុន ដ្បិតថាគ្រោះថ្នាក់ និងសេចក្តីស្លាប់អាចកើតមានឡើង គ្រប់ពេលវេលាទាំងអស់។ នៅទីបំផុត ដំណើរផ្សងព្រេង ការលះបង់ ការតស៊ូ និងការយកប្រយោជន៍ប្រទេសជាតិជាធំនេះ បានក្លាយជាបេសកកម្ម ដែលទទួលបានជោគជ័យជាប្រវត្តិសាស្ត្ររបស់កម្ពុជា ហើយបានធ្វើឲ្យកម្ពុជារីកចម្រើនលូតលាស់ រហូតមកដល់បច្ចុប្បន្ន”។
លោក ហ៊ុន ម៉ានី ក៏បានចោទសួរថា តើកម្ពុជានឹងអាចទៅជាយ៉ាងណា ប្រសិនបើកាលនោះពុក មិនបានធ្វើដំណើរផ្សងព្រេងដើម្បីរំដោះប្រទេសជាតិ?
