ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានថ្លែងថា រាជរដ្ឋាភិបាលកម្ពុជា បានផ្ទេរថវិកាប្រមាណ ១៦៦លានដុល្លារ ទៅឲ្យរដ្ឋបាលរាជធានី-ខេត្ត សម្រាប់ចាត់ចែង ប្រើប្រាស់លើការអនុវត្តមុខងារ សេវាសុខាភិបាល ក្នុងដែនសមត្ថកិច្ចរបស់ខ្លួន ។
ក្នុងពិធីប្រកាសផ្សព្វផ្សាយ និងដាក់ឲ្យដំណើរការ មន្ទីរសុខាភិបាលនៃរដ្ឋបាលរាជធានី-ខេត្ត នៅថ្ងៃទី៣ មិថុនានេះ សម្តេច ស ខេង បានមានប្រសាសន៍ថា ក្នុងរយៈពេលប៉ុន្មានខែ ដើមឆ្នាំនេះ ភាគីពាក់ព័ន្ធ បានរួមគ្នារៀបចំលិខិតបទដ្ឋានគតិយុត្ត និងបានអនុវត្តកិច្ចការអាទិភាពចាំបាច់មួយចំនួន ដើម្បីធានាដល់ការចាប់ផ្តើមអនុវត្ត អនុក្រឹត្យនេះ ដែលក្នុងនោះ រួមមាន ការផ្ទេរបុគ្គលិកសុខាភិបាលចំនួនជាង ២ម៉ឺននាក់ ទៅឲ្យរដ្ឋបាលរាជធានី-ខេត្ត សាមីនីមួយៗ។
សម្ដេច ស ខេង បញ្ជាក់ថា «ការដាក់ចេញនូវប្រកាសអន្តរក្រសួង ស្តីពីការផ្ទេរថវិកាចំនួនប្រមាណ ១៦៦លានដុល្លារ ទៅឲ្យរដ្ឋបាល រាជធានី-ខេត្ត សម្រាប់គ្រប់គ្រង ចាត់ចែង និងប្រើប្រាស់លើការអនុវត្តមុខងារផ្តល់សេវាសុខាភិបាល ក្នុងដែនសមត្ថកិច្ចរបស់ ខ្លួន និងប្រកាសអន្តរក្រសួង ស្តីពីការរៀបចំ និងការប្រព្រឹត្តទៅរបស់មន្ទីរ សុខាភិបាលនៃរដ្ឋបាលរាជធានី-ខេត្ត» ៕
