ភ្នំពេញ៖ សម្ដេច ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានប្រាប់ទៅកាន់ប្រជាពលរដ្ឋ កុំឲ្យមានការព្រួយបារម្ភខ្លាំងពេក ចំពោះការអនុវត្តន៍ច្បាប់ ចរាចរណ៍ រហូតដល់ថ្នាក់មិនហ៊ានខ្ចី យានជំនិះគ្នាបើកបរនោះ ខណៈសមត្ថកិច្ចឃាត់ សួរនាំរកឯកសារ តែពេលអ្នកបើកបរល្មើស ច្បាប់តែប៉ុណ្ណោះ។
ក្នុងពិធីផ្សព្វផ្សាយ របាយការណ៍ជាតិ ស្ដីពី ការប្រយុទ្ធប្រឆាំងអំពើជួញដូរមនុស្ស ឆ្នាំ២០១៩ និងទិសដៅការងារ ឆ្នាំ២០២០ របស់ គ.ជ.ប.ជ នាថ្ងៃទី២៧ ខែឧសភា ឆ្នាំ ២០២០ សម្ដេចក្រឡាហោម ស ខេង បានថ្លែងបញ្ជាក់ថា«បើខ្ចី(ម៉ូតូ ឬឡាន)គេមកប្រើ គឺប្រើទៅគ្មានអី។ (បើខ្ចី)ឡានក៏បើកទៅ ម៉ូតូក៏បើកទៅ។ ចៀសវាងតែម្យ៉ាងទេ កុំឲ្យតែបុកគេ ហើយកុំធ្វើខុសច្បាប់ បានន័យថាបើកឲ្យវាត្រូវច្បាប់ មានពីណាគេឆែកឯណា ហើយវាមិនមែនជា ការដាក់កុងត្រូលត្រួត ពិនិត្យរដ្ឋបាលទេ ទាល់កាលណាគាត់ខុសទើបបានឃាត់។ តែកាលណាខុសគេឃាត់នោះ គេសួរហើយ ក្រដាសស្នាមនៅឯណា អាឡានខ្ចីគេអត់មានក្រដាសស្នាម អាហ្នឹងខុសហើយ។ តែប៉ុណ្ណឹងតើ »៕
