ភ្នំពេញ៖ ស្របពេលដែលកម្ពុជា កំពុងរឹតបន្តឹងច្បាប់ចរាចរណ៍ផ្លូវគោក និងប្រយុទ្ធប្រឆាំងជាមួយជំងឺកូវីដ១៩ផងនោះ សម្ដេចតេជៅ ហ៊ុន សែន នាយករដ្ឋមន្ត្រីនៃកម្ពុជា បានបន្តអំពាវនាវឲ្យប្រជាពលរដ្ឋ ថែរក្សាសុខភាព និងអនាម័យឲ្យបានល្អ ជាពិសេសត្រូវតែគោរព ច្បាប់ចរាចរណ៍ ព្រោះគ្រោះថ្នាក់ចរាចរណ៍ បានសម្លាប់ជីវិតពលរដ្ឋ ច្រើនជាងជំងឺកូវីដ១៩ទៅទៀត ។
តាមរយៈបណ្ដាញ សង្គមហ្វេសប៊ុក នៅថ្ងៃទី២ ឧសភានេះ សម្ដេចតេជោ ហ៊ុន សែន បានអំពាវនាវឲ្យ បងប្អូនប្រជាពលរដ្ឋ បន្តយកចិត្តទុកដាក់ប្រុងប្រយ័ត្ន ថែរក្សាសុខភាពអោយបានល្អជានិច្ច ជាពិសេសក្នុងពេល ដែលប្រទេសជាតិកំពុ ងប្រយុទ្ធប្រឆាំងនឹងជំងឺឆ្លងកូវីដ១៩ ។
សម្ដេចបន្តថា ទោះបីចំនួនអ្នកដែលឆ្លងមេរោគ ត្រូវបានព្យាបាលជាសះស្បើយ ច្រើនស្ទើរអស់ហើយក្តី ហើយមកទល់ថ្ងៃនេះ ក៏ពុំមានអ្នកឆ្លងថ្មីក៏ដោយ ក៏សូមបងប្អូនប្រជាពលរដ្ឋ ត្រូវបង្កើនការប្រុងប្រយ័ត្នខ្ពស់ដោយប្រើម៉ាស ទឹកអាល់កុល និងជឹលលាងសម្អាត កម្ចាត់មេរោគនិងបាក់តេរីផ្សេងៗអោយបានជាប្រចាំ។
សម្ដេចតេជោបញ្ជាក់ថា «ស្របពេលនឹងការបង្កើន អនាម័យថែរក្សាសុវត្ថិភាព សុខភាពអាយុជីវិត សូមបងប្អូនប្រជាពលរដ្ឋ ជាពិសេសក្មួយៗយុវជន ត្រូវតែគោរពច្បាប់ចរាចរណ៍ ទាំងអស់គ្នាដាច់ខាត ព្រោះគ្រោះថ្នាក់ចរាចរណ៍ ដែលបានកើតឡើងរាល់ថ្ងៃ គឺបានសម្លាប់អាយុជីវិតពលរដ្ឋ ច្រើនជាងជំងឺឆ្លងកូវីវីដ១៩ ទៅទៀត» ។
សម្ដេចតេជោ ហ៊ុន សែន ក៏បានជូនពរបងប្អូនជនរួមជាតិ ឲ្យជួបតែសេចក្តីសុខ និងមានសុវត្ថិភាព ក្នុងការធ្វើដំណើរនៅគ្រប់ទីកន្លែង ទូទាំងប្រទេស ៕
