សមត្ថកិច្ចចុះបង្ក្រាប សម្ភារៈប្រឆាំងកូវីដ១៩ និងគ្រឿងសម្អាងខុសច្បាស់ ប្រមាណ ១៣តោន នៅសង្កាត់ភ្នំពេញថ្មី

ភ្នំពេញ៖ កម្លាំងសមត្ថកិច្ច របស់គណៈម្មាធិការប្រយុទ្ធប្រឆាំង ផលិតផលក្លែងក្លាយ (គ.ប.ផ.ក) នៅថ្ងៃទី៩ ខែមេសា ឆ្នាំ២០២០ បានចុះបង្ក្រាបផលិតផលនាំចូល ស្តុកទុក និងចែកចាយខុសច្បាប់ នូវសារធាតុសម្លាប់មេរោគ និងគ្រឿងសម្អាងជាង ២០០០កេស ស្មើនឹងប្រមាណ ១៣តោន នៅសង្កាត់ភ្នំពេញថ្មី ខណ្ឌសែនសុខ ។ នេះបើយោងតាមហ្វេសប៊ុក គណៈកម្មាធិការប្រយុទ្ធប្រឆាំង ផលិតផលក្លែងក្លាយ ។

ប្រតិបត្តិការចុះបង្ក្រាបនេះ គឺមានការសម្របសម្រួលដោយលោក សាយ ណូរ៉ា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ និងមានការចូលរួមពីសមត្ថកិច្ចពាក់ព័ន្ធ អាជ្ញាធរដែនដី មន្ត្រីសុខាភិបាលខណ្ឌ និងមន្ត្រីកាំកុងត្រូល នៃក្រសួងពាណិជ្ជកម្ម ។

ការចុះត្រួតពិនិត្យ នេះ គណៈកម្មាធិការអន្តរក្រសួង របស់ គ.ប.ផ.ក បានរកឃើញផលិតផល ខុសច្បាប់ជាច្រើនមុខសរុបចំនួនជាង ២,០០០កេស ស្មើនឹងប្រមាណ ១៣តោន (សារធាតុសម្លាប់
មេរោគ ម៉ាស់ និងគ្រឿងសម្អាង) ដូចជា៖ សាប៊ូកក់សក់ម៉ាក Max Care ចំនួន ៥កេស, សប៊ូកក់សក់ម៉ាក THDH ចំនួន ៥៦០កេស, ក្រណាត់ស៊ើម សម្លាប់មេរោគ ៧០០កេស, ម៉ាស់ម់ាក HI PM2.5 ចំនួន ៤កេស
, ជែលលាងដៃសម្លាប់មេរោគម៉ាក SOUEEUE (៥០០ម.ល) ចំនួន ៤៧៥កេស, ជែលលាងដៃសម្លាប់មេរោគម៉ាក Max Care (៥៥ម.ល) ចំនួន ៦០កេស, Spray បណ្តុះសក់ ចំនួន ៥កេស, Spray អាល់កុលម៉ាក Ferfanduo (១០០ម.ល) ចំនួន ៤៥កេស ។

បន្ទាប់ពីបានត្រួតពិនិត្យផលិតផលទំាងនេះ សមត្ថកិច្ចចម្រុះបានពិនិត្យ និងសន្និដ្ឋានបឋមទីតំាងនាំចូល ស្តុកទុក និងចែកចាយខាងលើ មិនអនុលោមតាមច្បាប់កំណត់ដូចជា៖ ពុំមានលើកស្លាកយីហោត្រឹមត្រូវ, ផលិតផលទាំងនេះ ពុំមានចុះបញ្ជិការ ឬលេខប្រវេទន៍ ពីក្រសួងសុខាភិបាល, គ្មានអញ្ញាប័ណ្ណបើកគ្រឹះស្ថានអាហរ័ណ នីហរ័ណគ្រឿងសម្អាង ពីក្រសួងសុខាភិបាល, គ្មានលិខិតបញ្ជាក់គុណភាព ផលិតផលពី ក្រសួងស្ថាប័នមានសម្ថកិច្ច, ផលិតផលទាំងនេះ អាចនឹងអន់គុណភាព ដែលអាចប៉ះពាល់ដល់សុខភាពស្បែក, គ្មានវិញ្ញាបនបត្របញ្ជាក់ ការដាក់លក់ផលិតផលលើទីផ្សារ, បានធ្វើការឃោសនាផ្សព្វផ្សាយ ផលិតផលទំាងនេះតាមបណ្តាញសង្គម Facebook ដោយមិនបានស្នើសុំការ អនុញ្ញាតពីក្រសួងសុខាភិបាល ។

ក្រោយពីបានពិនិត្យ និងការសន្និដ្ឋានខាងលើ សមត្ថកិច្ចចម្រុះ សម្រេចផ្អាកអជីវកម្មបណ្តោះអាសន្ន ហើយផលិតផលទាំងនេះ ឃាត់រក្សាទុកនៅទីតាំងដដែល និងដកហូតវត្ថុតាងមួយចំនួនយកទៅធ្វើការពិសោន៍
និងសមត្ថកិច្ចចម្រុះ គ.ប.ផ.ក កំពុងបានបន្តនីតិវិធី ចាត់វិធានការតាមច្បាប់ ។

ទន្ទឹមនេះដែរ គ.ប.ផ.ក ក៏បានអំពាវនាវដល់សាធារណៈជនមេត្តាចូលរួម និងសហការផ្តល់ព័ត៌មាន អំពីទីតាំងចែកចាយ ឫជនផលិត ដែលចែកចាយផលិតផលក្លែងក្លាយ-ខុសច្បាប់ ដែលធ្វើឲ្យប៉ះពាល់យ៉ាងធ្ងន់ធ្ងរដល់សុខភាព និងសុវត្ថិភាពសង្គម ដោយទំនាក់ទំនងផ្តល់ព័ត៌មានតាមរយៈលេខទួរស័ព្ទ ០៨១ ៩៩៩ ៨០៨ ឬបណ្តាញសង្គមហ្វេសប៊ុក (Facebook Page) “ គណៈកម្មាធិការប្រយុទ្ធប្រឆាំងផលិតផលក្លែងក្ហាយ-Counter Counterfeit Committee ” រាល់ព័ត៌មាន របស់សាធារណៈជន ដែលរាយការណ៍មក គ.ប.ផ.ក គឺនឹងត្រូវរក្សាការសម្ងាត់ ៕