ភ្នំពេញ៖ ជាដំណឹងល្អមួយ សម្រាប់បងប្អូនប្រជាពលរដ្ឋ ដែលរស់នៅខេត្តសៀមរាប និយាយជារួមសម្រាប់ប្រជាពលរដ្ឋកម្ពុជាទាំងអស់ផងដែរ ព្រោះយុទ្ធនាការដាក់ដាច់ ដោយឡែក លើអ្នកដែលប៉ះពាល់ ជាមួយបុគ្គល វិជ្ជមានមេរោគ COVID-19 ទាំង៧នាក់ ត្រូវបានបញ្ចប់ហើយ។
យោងតាមរដ្ឋបាលខេត្តសៀមរាប នៅថ្ងៃទី០៥ ខែមេសា ឆ្នាំ២០២០ បើតាមការបញ្ជាក់របស់មន្ទីរសុខាភិបាលខេត្ត បានឲ្យដឹងថា បានបញ្ចប់នូវការតាមដាន ការដាក់នៅដោយ ឡែករយៈពេល១៤ថ្ងៃ ចំពោះអ្នកដែលពាក់ព័ន្ធប៉ះពាល់ ដោយផ្ទាល់និង ដោយប្រយោល ជាមួយបុគ្គលវិជ្ជមានមេរោគ COVID-19 ទាំង៧នាក់ ក្នុងខេត្តសៀមរាប (បានជាសះស្បើយជនជាតិខ្មែរ២នាក់, ៥នាក់កំពុងតែស្ថិតនៅបន្តការព្យាបាលក្នុងមន្ទីរពេទ្យ ដែលក្នុងនោះមានជនបរទេស២នាក់, បុរសខ្មែរ១នាក់, ស្រ្តីខ្មែរ១នាក់ និងក្មេងប្រុសម្នាក់) ។
សូមគោរពថ្លែងអំណរគុណ ចំពោះក្រុមគ្រូពេទ្យ មន្ទីរសុខាភិបាល និងសមត្ថកិច្ចពាក់ព័ន្ធគ្រប់ថ្នាក់ក្នុងការចូលរួមប្រយទ្ធនឹងការរីករាលដាលជំងឺកូវីដ តាមរយៈការគាំទ្រ ការសម្របសម្រួល និងសហការ ក្នុងការប្រតិបត្តិការងារច័ត្តាឡីស័ក។
ជាមួយគ្នានេះ ក្រុមគ្រូពេទ្យជំនាញ ក្រុមការងារច័ត្តាឡីស័ក និងក្រុមការងារឆ្លើយតបបន្ទាន់ នៃមូលដ្ឋានសុខាភិបាលសាធារណៈខេត្តសៀមរាបនឹងខិតខំបន្តការងារពិនិត្យស្រាវជ្រាវ រកអ្នកដែលប្រឈមមុខនៃការឆ្លងមេរោគ COVID-19 នេះ ក្នុងខេត្តសៀមរាបបន្តទៀត ជាពិសេស ក្នុងចំណោមបងប្អូនប្រជាពលរដ្ឋដែលត្រលប់មកពីបរទេស ដែលបាននិងកំពុងតែដាក់ឲ្យអនុវត្តនូវវិធានការរស់នៅដោយឡែក រយៈពេល១៤ថ្ងៃ នៅតាមមូលដ្ឋាន តាមក្រុមគ្រួសាររៀងៗខ្លួន។
អាជ្ញាធរខេត្ត ក៏ដូចជាមន្ទីរសុខាភិបាលសង្ឃឹមនិងជឿជាក់ថាបងប្អូនប្រជាពលរដ្ឋគ្រប់ៗគ្នា អាជ្ញាធរមូលដ្ឋាន ថ្នាក់ដឹកនាំគ្រប់លំដាប់ថ្នាក់ ស្ថាប័ន វិស័យឯកជនទាំងឡាយនឹងធ្វើការរួមកំលាំងប្រយុទ្ធប្រឆាំង នឹងការឆ្លងមេរោគ COVID-19 នេះក្នងខេត្តសៀមរាប ឲ្យមានប្រសិទ្ធភាព និងទទួលបានជោគជ័យ៕
