ភ្នំពេញ៖ ក្រោយពីបានបង្ហាញសារពាក់ព័ន្ធនឹងអ្នកកំចីប្រាក់ធនាគារ ហើយស្រែកឲ្យសម្តេចតេជោជួយ នឹងដៀលជនដែលកំចីធនាគារជាមនុស្សចោលម្សៀត បានធ្វើឲ្យសាធារណៈជន ខឹងសម្បារយ៉ាងខ្លាំង ហើយមកដល់ព្រឹកនេះលោក ពេជ្រ ស្រស់ ប្រធានគណបក្សយុវជនកម្ពុជា បានលើកឡើងថា គួរតែសមត្ថកិច្ចចាត់វិធានការទៅលើបុគ្គលឈ្មោះ IMan-KH ដើម្បីកុំឲ្យ ចំប៉ី ខ្មៅ (យិន ហេង) ស្រែកអយុត្តិធម៌ ។
ថ្វីបើចេញវីដេអូសុំទោស ចំពោះកំហុសខុសឆ្គងរបស់ខ្លួន ដោយបញ្ជាក់ថា ខ្លួនពិតជាខុស ក៏ព្រោះតែខ្លួនមានភាគហ៊ុនក្នុងមីក្រូហិរញ្ញវត្ថុតូចមួយ ក្តី ប៉ុន្តែរឿងនេះ មិនទាន់ចប់មិនទាន់ហើយនោះទេ។
លោក ពេជ្រ ស្រស់ បានសរសេរនៅលើបណ្តាញសង្គមរបស់លោកនៅព្រឹកនេះថា« ការសុំទោសគឺធ្វើបានតែកំហុសណា ដែលមានលក្ខណៈស្រាលនិងទម្ងន់កំហុសមិនស្ថិតនៅក្នុងក្រមព្រហ្មទណ្ឌតែប៉ុណ្ណោះ ប៉ុន្តែលោកបានសាងនូវកំហុសធ្ងន់ធ្ងរណាស់សម្រាប់ជនជាតិខ្មែរទូទាំងនគរ ដូច្នេះសូមសមត្ថកិច្ចចាត់ការតាមផ្លូវច្បាប់ ដើម្បីកុំឲ្យលោក ចំប៉ីខ្មៅ (យិន ហេង) ស្រែកអយុត្តិធម៌ចំពោះខ្លួនគាត់។ ២៦/០៣/២០២០ ៕»
